Qytaıda bir táýlikte 33 myńǵa jýyq adam koronavırýs juqtyrdy

BEIJІŃ. QazAqparat – Qurlyqtaǵy Qytaıda ótken táýlikte COVID-19 ınfektsııasyn juqtyrýdyń 32 943 jańa jaǵdaıy anyqtaldy. Bul týraly juma kúni QHR Densaýlyq saqtaý máseleleri jónindegi memlekettik komıteti málim etti, dep habarlaıdy QazAqparat menshikti tilshisi.

Aýrý juqtyrýshylardyń 29 840-y – sımptomsyz tasymaldaýshylar, 3 103 adamda koronavırýs rastalǵan.

Sońǵy kúnderi Gýandýn, Hebeı provıntsııalarynda, sondaı-aq Chýntsın men Beıjińniń ortalyq qalalarynda aýrýǵa shaldyqqandar sany artqany baıqaldy.

Qytaı astanasynyń bıligi turǵyndardan kúrdeli epıdemıologııalyq jaǵdaıǵa baılanysty úıinen shyqpaýdy ótindi.

Beıjińde qarasha aıynyń basynan beri 10 myńnan astam adamnyń koronavırýs juqtyrǵany anyqtaldy.

Qarasha aıynan bastap Qytaıdyń barlyq derlik aımaqtarynda koronavırýs jyldam tarap, aýrý juqtyrǵandar sany artyp jatyr.

Materıktik Qytaıda koronavırýs juqtyrýshylardyń maksımaldy ósimi ekinshi kún qatarynan jańaryp otyr.

24 qarashada elde COVID-19 ınfektsııasynyń 31 myńnan astam jaǵdaıy tirkeldi.

Eske sala keteıik, Qytaıda sońǵy 6 aı ishinde alǵash ret koronavırýstan bolǵan kisi ólimi 22 qarasha kúni tirkelgen bolatyn.

Foto: russian.news.cn