Qytaıda balany mektepke daıyndaýǵa qansha qarajat jumsalady

BEIJІŃ. QazAqparat – Qytaı Halyq Respýblıkasynda (QHR) 9 jyl tegin bilim alý mindetti. QHR-da 2022 jyly toǵyzjyldyq bilim alý kórsetkishi 95,5% boldy, dep habarlaıdy QazAqparattyń menshikti tilshisi.

Al úlken mektepke qabyldaý kórsetkishi byltyr 91,6%-dy kórsetti. QHR Bilim mınıstrliginiń deregi boıynsha, 2022 jyly elde bilimge jumsalǵan qarjy 6,13 trln ıýannen ($846 mlrd) asty. Bul ótken jylmen salystyrǵanda 6%-ǵa kóp. Sonymen qatar 2022 jyly bilimge bólingen memlekettik bıýdjet 4,85 trln ıýan boldy.

2022 jyldyń qorytyndysy boıynsha, Qytaı JІÓ kólemi 121,02 trln ıýange ($18 trln shamasynda) jetken bolatyn. Osylaısha, bilimge bólingen bıýdjet shyǵyny úlesi eldiń JІÓ-niń 4%-yna teń bolǵan. 2022 jyly mektepke deıingi bilim berý shyǵyny (2021 jylmen salystyrǵanda) 3%-ǵa, mindetti bilim berý 6,7%, joǵarǵy synyptar shyǵyny 8,5%, joǵary bilim berý 6,2% artty.

Qytaıda balany bastaýysh mektepke daıyndaýǵa 800-den 1500 ıýange deıin jumsalady. Mektep formasy 600–700 ıýan shamasynda, biraq bul baǵaǵa jaz, kóktem jáne qys mezgilderine arnalǵan kıimder kiredi. Ereje boıynsha, mektep ákimshiligi mektep kıimin tigetin óndirýshilermen tikeleı baılanysqa shyǵyp, olar daıyn formany bilim berý mekemelerine jetkizedi.

Qytaıda ata-analardyń kóbi qaǵaz, qalam syndy mektep quraldaryna ınternet arqyly tapsyrys beredi. Baǵasy – 100-400 ıýan aralyǵynda. Oǵan rıýkzak qosylady – 100 ıýannen 400 ıýange deıin.