Qytaıda balalardy ádeıi ýlandyrǵan balabaqsha tárbıeshisi darǵa asyldy

BEIJІŃ. TASS – QazAqparat – Henan provıntsııasy Tszıaotszo qalasynyń orta deńgeıli halyq soty 25 balany natrıı nıtratymen qasaqana ýlandyrǵan burynǵy balabaqsha tárbıeshisiniń darǵa asylǵanyn rastady, dep habarlaıdy QazAqparat Reseıdiń TASS agenttigine silteme jasap.

«Penpaı» basylymynyń habarlaýynsha, 2019 jyly naýryzda Tszıaotszo qalasyndaǵy balabaqshalardyń birinde balalardyń tamaqtan jappaı ýlanýy tirkelgen. Polıtsııa tergeýden keıin anyqtalǵandaı, tárbıeshi Van ıÝn balalardyń tańǵy asyna natrıı nıtratyn qosqan. 25 bala zardap shegip, olardyń biri 10 aı em qabyldaǵannan keıin kóz jumǵan.

Onyń qylmysqa barýyna balabaqshadaǵy áriptesteriniń birimen týyndaǵan janjal túrtki bolǵan.

Jergilikti BAQ-tyń jazýynsha, ata-analar burynǵy tárbıeshiniń keshirimin qabyldamaǵan. Sondaı-aq, tergeý barysynda tárbıeshi balalardy oılamaǵanyn, áriptesinen kek almaqshy bolǵanyn moıyndaǵan.

Tergeýshiler 2017 jyly áıeldiń kúıeýimen turmystyq janjal kezinde onyń sýsynyna natrıı nıtratyn qosqanyn anyqtady. Saldarynan kúıeýi orta deńgeıde ýlanǵan.

Ýlaýshy 13 shildede darǵa asyldy.

Eske salaıyq, taıaýda Qytaıdyń Gýandýn provıntsııasynda balabaqshaǵa er adam pyshaqpen shabýyldaǵan. Alty adam qaza tapty.