Qytaıda apatqa ushyraǵan Boeing ushaǵynyń bortynda qaýipti júk bolmaǵan
Habarlamada Qytaıda Boeing ushaǵy apatqa ushyraǵan kúni jolaýshylar ushaǵynyń jumysynda aqaý bolmaǵany atap ótildi.
«Ushaq bortynda qaýipti dep jiktelgen júk bolǵan joq. Ushýlardy baqylaý ınfraqurylymynyń jumysynda jáne tehnıkalyq aqaýlar anyqtalǵan joq. Qaýipti aýaraıy týraly aqparat ta jarııalanbady», - delingen qujatta.
23 naýryzda qutqarýshylar birinshi «qara jáshikti» tapty, ol dybys jazý qurylǵysy (CVR) bolyp shyqty. 27 naýryzda ekinshi ushý derekterin jazý qurylǵysy (DFR) tabyldy.
Halyqaralyq azamattyq avıatsııa týraly konventsııaǵa sáıkes, oqıǵa bolǵan kúnnen bastap 30 kún ishinde tergeýdi uıymdastyratyn memleket IKAO-ǵa aldyn ala tergeý esebin jiberýge mindetti.
«Ushaq Kýnmın qalasyndaǵy Chanshýı áýejaıynan jergilikti ýaqyt boıynsha 13:16-da kóterilip, saǵat 13:27-de 8900 m bıiktikke jetip, 14:17-de Gýanchjoý áýe qozǵalysyn basqarý aımaǵyna kirdi. Saǵat 14:20-da Gýanchjoý aımaqtyq áýe qozǵalysyn basqarý radarynda «komandalyq bıiktikten aýytqý» eskertýi paıda boldy. Saǵat 14:21-de radar sońǵy ret kelesi aqparatty tirkedi: bıiktigi - 3380 m, jer ústindegi jyldamdyǵy - 1010 km/saǵ. Sodan keıin ushaqtyń radıolokatsııalyq sıgnaly joǵalyp ketti», - delingen habarlamada.
Buǵan deıin QHR Azamattyq avıatsııa basqarmasy habarlaǵandaı, Boeing 737 áýe kemesi 2015 jyldyń maýsym aıynda paıdalanýǵa berilgen. Apatqa deıin ushaq 8 986 ushýdy oryndap, jalpy ushý uzaqtyǵy 18 239 saǵatqa jetken.
Eske sala keteıik, 21 naýryzda Qytaıdyń ońtústigindegi Gýansı-Chjýan avtonomdyq aýdanynda apatqa ushyraǵan ushaqtyń ekinshi «qara jáshigi» tabylǵanyn habarlaǵan bolatynbyz. Sodan soń jolaýshylar arasynda qazaqstandyqtardyń bolmaǵany aıtylǵan.