Qytaıda 2022 jylǵy Olımpıada oıyndary medalderiniń dızaıny usynyldy

BEIJІŃ. QazAqparat – 2022 jylǵy qysqy Olımpıada oıyndarynyń uıymdastyrý komıteti (Beıjiń-2022) oıyndardyń júldegerlerine taǵylatyn medalder dızaınyn usyndy. Bul týraly «Beıjiń-2022» uıymdastyrý komıtetiniń saıtynda habarlanyp otyr, dep jazady QazAqparat tilshisi.

Medaldiń basty betinde olımpıadanyń bes saqınasy beınelenip, sport sharasynyń aǵylshyn tilindegi tolyq ataýy – XXIV Olympic Winter Games Beijing 2022 dep jazylǵan, sondaı-aq bult jáne qar ushqyndaryme órnektelgen.

Medal betinen aspan, jer jáne adam arasyndaǵy úılesimdikti beıneleıtin qytaılyq dástúrli fılosofııany bildirgen bes shoǵyrlas saqınany kórýge bolady.

Reversinde Beıjińdegi qysqy Olımpıadanyń emblemasy men oıyndardyń qytaı tilindegi ataýy bar. Emblemanyń jan jaǵyndaǵy saqınalarda esep boıynsha 24-shi qysqy Olımpıada oıyndarynyń qurmetine 24 núkte oıylǵan.

«Beıjiń-2022» uıymdastyrý komıteti sondaı-aq Paralımpıada oıyndarynyń júldegerlerine beriletin nagradalar dızaınyn da usynǵan.

Eske sala ketsek, XXIV qysqy Olımpıada oıyndary 2022 jyldyń 4-20 aqpan kúnderi Beıjiń qalasynda ótedi.

Avtory Rýslan Súleımenov