Qytaıda 130 mln jyl buryn tirshilik etken dınozavrlar qaldyǵy tabyldy

ShITsZıAChJÝAN. QazAqparat – Qytaıdyń soltústigindegi Hebeı provıntsııasyna jaqyn mańda shamamen 130 mln jyl buryn tirshilik etken eki dınozavrdyń tasqa aınalǵan qaldyǵy tabyldy. Bul týraly jergilikti tabıǵı resýrstar agenttigi uıymdastyrǵan brıfıngte aıtyldy, dep habarlaıdy QazAqparat Sınhýa agenttigine silteme jasap.

Qaldyqtar Chende qalasy Fennın-Manchjýr avtonomdy ýezi aýmaǵynan alyndy. Olar eki qusjambasty dınozavr ınfrajasaǵy – stegozavr men múıizdi dınozavrǵa jatady.

Uzyndyǵy 5 metrlik stegozavr qaldyǵy minsiz saqtalǵan. Tasqa aınalǵan súıek aınalasynan teri bólikteri tabyldy, ol qabyrshaq qurylymy boıynsha qazirgi jylan nemese kesirtkelerdiń qabyǵyna uqsaıdy.

«Bizdiń zamanymyzǵa deıin dınozavr terisiniń saqtalýy – sırek kezdesetin, ǵylymı qundylyǵy joǵary qubylys», - dep jazady Lını ýnıversıteti geologııa jáne paleontologııa ınstıtýtynyń qyzmetkeri Go In.

Onyń pikirinshe, stegozavrdyń teri bóligi tabylǵan aýmaq – 3 sharshy metr. Olja dınozavr túriniń ereksheligi, terisiniń fızıologııalyq qyzmeti, geografııalyq jaǵdaı men klımattyń ózgerýi syndy baǵyttardy tereń zertteýge múmkindik beredi.

Ekinshisi – ǵalymdardyń pikirinshe, súıekti dınozavrlardyń «kóne» ókili. Onyń bas súıeginde rostraly súıek sál ǵana shyǵyp tur, al artqy aıaq-qoly aldyńǵysynan aıtarlyqtaı uzyn. Instıtýt professory Chjan Fýchen mundaı olja qusjambasty dınozavrlardyń osy túrin zertteý salasyndaǵy bilimdi tereńdetýge múmkindik beretinin aıtady.