Qytaı júk qabyldaýdyń jańa tártibin engizdi. Eksportshylar kómek surap otyr
Qytaı shekarasynda kúrdeli jaǵdaı qalyptasty. 12 myńnan astam tıelgen vagon qabyldaýdy kútýde.
Jyljymaly quramnyń jınalyp qalýyna QHR jaǵynan sanıtarlyq baqaýdy engizý yqpal etti. Atalǵan tártip búgingi kúnge deıin saqtalýda.
Qazaqstan astyq óndeýshiler odaǵynyń prezıdenti Evgenıı Gan júıeli máseleni «QTJ» UK» AQ, Atameken jáne múddeli mınıstrlikterdiń birlesken kúsh-jigeriniń arqasynda sheshýge bolady dep sanaıdy.
«Biz «bir tereze» qaǵıdaty boıynsha, aıtaıyq tek «QTJ» UK» AQ jumys istegimiz keledi. Kópqurylym jumysqa kedergi keltiredi», dedi ol.
«QTJ-Júk tasymaly» JShS bas dırektorynyń birinshi orynbasary Qanat Kóbesov ulttyq júk tasymaldaýshy Dostyq – Alashańqaı shekaralyq ótkelinde Tasymal josparyn tolyq kólemde oryndaý men úzdiksiz tasymaldaýdy qamtamasyz etý úshin barlyq kedergilerdi joıý jáne ótkizý múmkindigin jaqsartý boıynsha sharalar qabyldaýda ekendigin atap kórsetti.
Atap aıtqanda, Úrimshi temir joly ókilderimen tıelgen poıyzdardy qabyldaýdy eki esege – táýligine 14 jup poıyzǵa deıin qabyldaý kelissózderi júrgizildi. Temirjolshynyń pikiri boıynsha, bunda úlken áleýet bar.
Qanat Kóbesov «QTJ» UK» AQ men Úrimshi temir joldary arasynda Yntymaqtastyq týraly kelisim sheńberinde táýligine 18 jup poıyzdy kedergisiz qabyldaý jáne berý múmkin ekendigin qaperge saldy. Dostyq – Alashańqaı shekaralyq ótpesi arqyly osynshama poıyzdar almasymy osy jyldyń jazynda júzege asyryldy. Qazaqstandyq shekaralyq stantsııasy osynshama kólemdegi vagondar berýdi qamtamasyz etýge daıyn.
Qazaqstandyq temirjolshylar QHR keletin poıyzdardy belgilengen merzimde jáne kólemde qabyldaýda. Sonymen qatar, tıeýge májbúrlik tyıym salý is-áreketimen baılanysty «QTJ-Júk tasymaly» JShS júkjóneltýshilerge Tıeý josparyn oryndamaǵany úshin salynatyn aıyppuldy alyp tastady.
- Biz onlaın rejımindegi únqatysýǵa daıynbyz. Qytaılyq ákimshilik ókilderimen shekaralyq temirjol ótkelderi arasyndaǵy tasymaldardy uıymdastyrý máseleleri ár seısenbi saıyn talqylanatyn bolady. Bizde qytaılyq áriptestermen aıtarlyqtaı tıimdi kommýnıkatsııa úshin tehnıkalyq múmkindikter bar, kelissózder protsesine múddeli memlekettik organdardy da qosylýǵa shaqyramyz, - dedi Qanat Kóbesov.
Qanat Kóbesov júıeli máselelerdi anyqtaý men olardyń sheshimin izdeý úshin múddeli memlekettik organdardyń, otandyq eksporttaýshylardyń jáne ózge de qurylymdardyń qatysýymen jedel top qurýdy usyndy.
Óz kezeginde eksporttaýshylar «Astyq Trans» AQ tarapynan vagondardyń turyp qalýyna normatıvten tys negizsiz aıyppuldar salýyna shaǵymdandy. Olardyń pikirinshe, fors-majorlyq jaǵdaı eskerilýi tıis.
Onlaın-konferentsııany aıaqtaı kele moderator, «Atameken» QR UKP basqarýshy dırektory Erbol Eseneev temir jol, salalyq qaýymdastyqtar ókilderimen osyndaı kezdesý ótkizý kútkendegideı nátıje beretindigin alǵa tartty.