Qytaı ıýani álemde eń kóp satylatyn besinshi valıýtaǵa aınaldy
Bank esebine sáıkes, qytaı ıýaniniń saýdasy 2019 jylǵy 4% salystyrǵanda 2022 jyly álemdik valıýta aınalymynyń 7%-yn qurady. AQSh dollary naryqtaǵy 90%-ǵa jýyq úlesimen óziniń ústem jaǵdaıyn saqtap qaldy, al eýronyń úlesi 31%-ǵa deıin azdap tómendep, ekinshi eń belsendi saýdalanǵan valıýta bolyp qaldy. Japon ıeni (17%) men fýnt sterlıng (13%) alǵashqy «bestiktegi» pozıtsııalaryn saqtap qaldy.
Bırjadan tys valıýta naryqtaryndaǵy saýda kólemi 2022 jyldyń sáýirinde kúnine 7,5 trln dollarǵa jetti. Bul úsh jyl burynǵy 6,6 trln dollardan 14%-ǵa ósip, jańa rekord ornatty.
Bank esebinde jarııalanǵan statıstıka 52 ıýrısdıktsııadaǵy ortalyq bankter men basqa organdardyń qatysýymen sáýir aıynda jasaldy.
Qytaı Halyq bankiniń (Ortalyq bank) málimetinshe, 2020 jylmen salystyrǵanda ıýanmen transshekaralyq esep aıyrysý kólemi ótken jyly 29%-ǵa ósip, 36,61 trln ıýanǵa (5,12 trln dollar) jetti.
Jergilikti BAQ habarlaýynsha, Qytaıdyń «Jibek joly ınvestıtsııalyq qory» shilde aıynda Indonezııanyń ulttyq ál-aýqat qoryna 20 mlrd ıýanǵa deıin ınvestıtsııa salý týraly ınvestıtsııalyq kelisimge qol qoıdy. Investıtsııa tólemniń qolaıly túri retinde ıýandy paıdalanady.
Qyrkúıek aıynda reseılik «Gazprom» men Qytaıdyń China National Petroleum Corp Qytaıǵa tabıǵı gaz jetkizgeni úshin tólemderdi rýbl jáne ıýanmen aýdarý týraly kelisimge qol qoıdy.
Sońǵy kezde Ortalyq Azııada ıýandi qoldanýdyń aıtarlyqtaı óskeni baıqalady. Qyrkúıek aıynda Qazaqstan Respýblıkasynyń Ulttyq banki men Qytaı Halyq Respýblıkasynyń Halyq banki Qazaqstanda ıýanmen operatsııalar júrgizý úshin klırıngtik esep aıyrysýlardy qurý maqsatynda yntymaqtastyq týraly memorandýmǵa qol qoıdy.
Rýslan Súleımenov
Foto: thelawyer.com