Qytaı ýnıversıtetterinde qazaq tilinen baıqaý ótedi – sheteldegi qazaq baspasózi
Jaqynda Qytaı ýnıversıtetterinde qazaq tili boıynsha baıqaý ótedi - People.cn
Qytaıda qazaq tilinde bilim berýdi damytýǵa járdemdesý jáne Qytaı men Qazaqstan arasyndaǵy gýmanıtarlyq saladaǵy yntymaqtastyqqa járdemdesý maqsatynda Qazaqstannyń Qytaıdaǵy Elshiligi usynyp, Beıjiń shetel tilderi ýnıversıteti uıymdastyrǵan Qytaı ýnıversıtetteri arasyndaǵy qazaq tili baıqaýy ótedi, dep jazady «Halyq» gazeti.
Atalǵan basylymnyń málimetinshe, 20 naýryz kúni ótetin bul baıqaý Qytaı bilim mınıstrliginiń Halyqaralyq departamentiniń qoldaýymen uıymdastyrylady. Baıqaýǵa búkil eldegi ýnıversıtetterde shet tili mamandyǵy qazaq tili boıynsha bilim alatyn qytaılyq bakalavr stýdentteri qatysady.
Ózbekstandaǵy jas dombyrashylar kórermen yqylasyna bólendi - «Tamdy sharýageri»
11 naýryz kúni Ózbekstandaǵy Naýaı oblysynyń Tamdy qazaq aýdanynda 15 aýyldan kelgen 500-ge jýyq jas dombyrashy Tamdy aýdandyq mádenıet úıinde «Ónerli dombyrashy jastar» baıqaýynda ózara baq synasyp, ónerlerin ortaǵa saldy.
Bul týraly osy aptada ózbekstandyq «Tamdy sharýageri» gazeti Facebook-tegi paraqshasynda «newsroom.kz» basylymyna silteme jasap habarlady.
Atalǵan basylymnyń keltirgen málimetine súıensek, jastar arasyndaǵy talantty ónerpazdardy anyqtap, halqymyzdyń tól mádenıetin, dástúrli terme, jyraýlyq pen orkestr oryndaýyndaǵy án-kúı mádenıetin óskeleń urpaqqa dáripteýdi maqsat etken baıqaý osy joly segizinshi ret ótkizildi.
Óner saıysyn Tamdy aýdany ákimdigi, aýdandyq mádenıet bólimi, aýdandyq halyqqa bilim berý bólimi, aımaqtyq Jastar isi agenttigi jáne Ózbekstan Jastar odaǵy Tamdy aýdandyq bólimi uıymdastyrǵan. Tamdylyq ónerpaz daryndardyń basyn qosqan dástúrli baıqaýdyń jaýapty uıymdastyrýshysy - Nurlan Beknazarov.
Mádenıet qyzmetkerleri men aýyl mektepteri oqýshylary qoldaýyn taýyp, búginde jyl saıyn kórermender men tamdylyq jalyndy jastar asyǵa kútetin óner saıysyna aınalyp úlgergen baıqaý sharttary jyl saıyn kúrdelene túsýde. Bıyl dombyradan basqa ulttyq aspaptar – saz syrnaı, qobyz, baıan, shyldyrmaq t.b. qosylyp, balalar óneri túrli ulttyq aspaptarda kórinis tabady.
Newsroom.kz basylymynyń dereginshe, baıqaýǵa qatysýshylar Qurmanǵazy, Dáýletkereı, Abyl, Táttimbet, Mahambet, Dına, Súgir, Qazanǵap syndy kúı alyptarynyń, sondaı-aq Taýelibaı kompozıtorlary týyndylary men halyq kúılerin oryndap, tamdylyq kórermender yqylasyna bólengen. Baıqaý nátıjesine oraı júldeli І, ІІ, ІІІ oryn ıegerleri anyqtaldy. Al, bas júldege №12 mekteptiń daryndy dombyrashylary laıyq dep tanyldy. Atalǵan dombyrashylar baıqaýda oryndaýshylyq sheberligi, orkestr oryndaǵan án-kúıiniń kórkemdik deńgeıi jáne sahnalyq mádenıeti men ulttyq kıim úlgisi, daryny arqyly qatarlastarynan oza shaýyp, bas júldeni enshilegen.
Mońǵolııa úkimeti aýylǵa kóshkenderdi qoldaıdy – «Kaznews»
Mońǵolııa úkimeti júzege asyryp jatqan «Jańa jańǵyrý saıasaty» aıasynda «Aýyldyń jańǵyrýy» atty konferentsııa uıymdastyryldy. Bul rette Mońǵolııa úkimeti qaladan aımaqqa, aýylǵa kóshýge nıet bildirgen azamattardy jan-jaqty qoldaıtynyn jetkizdi, dep habarlaıdy Mońǵolııanyń «Kaznews» aqparattyq portaly.
Atalǵan aqparat kóziniń keltirgen deregine súıensek, ortalyqsyzdandyrý jáne aımaq halqyn arttyrý maqsaty aıasynda iri eldi mekenderdiń halqy 20 paıyzǵa, al aımaq halqy 10 paıyzǵa artady.
Jergilikti jerlerge (aýylǵa) kóship kelgen azamattarǵa 3 paıyzdyq ıpotekalyq nesıe berilmek.
Sonymen qatar «Jańa jańǵyrý saıasaty» aıasynda aýylǵa qonys aýdarǵan kásiporyndarǵa bir paıyzdyq jeńildikpen nesıe berý josparlanǵan.
Qytaı-Qazaqstan logıstıkalyq yntymaqtastyq bazasynan attanǵan poıyz sany 5 myńnan asty – People.cn
Qytaıdyń Nankın kedeniniń statıstıkasyna sáıkes, 14 naýryzdaǵy jaǵdaı boıynsha Qytaı-Qazaqstan logıstıkalyq yntymaqtastyq bazasy (Lıanıýngan) jalpy 5 myń Qytaı-Eýropa poıyzyn jiberip, 440 myńnan astam TEU-ni (Eýropalyq odaq týraly shart) tasymaldady. Bul óz kezeginde «Bir beldeý, bir jol» Halyqaralyq ekonomıkalyq jáne saýda yntymaqtastyǵy maqsatynda júzege asyrylǵan alǵashqy platforma jobasy bolyp otyr, dep habarlaıdy Qytaıdyń «People.cn» aqparat portaly.
Atalǵan basylymnyń dereginshe, batys baǵyttaǵy tranzıt 157 myńǵa jetip, eldegi jetekshi kórsetkishke aınaldy. Bul poıyz baǵyttary Ortalyq Azııanyń bes elinen Túrkııa, Germanııa, Reseı, Mońǵolııa jáne basqa elderdi qamtıtyn 6 jelige keńeıdi, barlyǵy 104 halyqaralyq júk stansasy bar.
Erdoǵan TMU sammıtinde sóz sóıledi– «TRT»
Túrkııa prezıdenti Rejep Taııp Erdoǵan Ankaradaǵy Prezıdent saraıynda uıymdastyrylǵan Túrki Memleketteri Uıymynyń (TMU) kezekten tys sammıtine qatysty málimdeme jasady. Bul týraly osy aptada Túrkııa Radıo Televızııa portaly habarlady.
Sammıttiń sátti aıaqtalǵanyn atap ótken Erdoǵan, Túrkııadaǵy jer silkinisi men sý tasqynynan keıin uıym músheleri men baqylaýshylarymen birge yntymaqtasý maqsatynda bas qosqandaryn aıtqan.
Sondaı-aq Rejep Taııp Erdoǵan Túrik ınvestıtsııa qorynyń túrik álemindegi ekonomıkalyq ıntegratsııaǵa úles qosatynyn málimdegen.
Sammıtke qatysqan memleketter basshylaryna alǵys bildirgen túrik eliniń basshysy: «Basymyzdan ótken apatta túrik álemi retinde kórsetken yntymaq pen bereke-birlikti eshqashan umytpaımyz», - dedi.
Erdoǵan Túrik álemindegi ıntegratsııanyń qozǵaltqyshy bolyp tabylatyn ekonomıka, saýda, kólik jáne energetıka salalaryndaǵy yntymaqtastyq máselesi de qaralǵanyn aıtyp ótken.
Qazaqstan Iran men Saýd Arabııasy arasyndaǵy qarym-qatynasty qalpyna keltirýdi qoldady – «Parstoday»
Qazaqstannyń Syrtqy ister mınıstrligi Saýd Arabııasy men Iran arasyndaǵy kelisim men dıplomatııalyq qarym-qatynasty jaqsartýdy quptady, dep habarlady ırandyq «Parstoday» aqparat agenttigi.
Atalǵan aqparat agenttiginiń málimetinshe, Qazaqstannyń Syrtqy ister mınıstrligi osy jumada Astananyń Saýd Arabııasy Koroldigi men Iran Islam Respýblıkasy arasyndaǵy dıplomatııalyq qarym-qatynastardy qalpyna keltirý maqsatynda 2023 jylǵy 10 naýryzda Beıjińde qol jetkizilgen kelisimderdi quptaıtynyn habarlady.
«Qol jetkizilgen kelisimder Qazaqstannyń ıslamdyq tatýlasý jónindegi bastamasyna tolyǵymen sáıkes keledi, dep atap ótti QR Syrtqy ister mınıstrligi. Bul mınıstrlik Tehran men Er-Rııad ókilderiniń Qytaıdaǵy kelissózderi men osy eldiń rólin joǵary baǵalady», dep jazady ırandyq BAQ.
Orta ǵasyrǵa tıesili qundy zattar tabyldy - «ÓzA»
Ózbekstan men Qazaqstan joǵary bilim salasynda yntymaqtastyq jasaıdy. Bul rette osyndaı mazmundaǵy «Halyqaralyq kelisimdi bekitý týraly» Ózbekstan prezıdentiniń sheshimi qabyldandy. Soǵan sáıkes, Ózbekstan men Qazaqstan Respýblıkalary arasynda joǵary bilim jáne joǵary oqý ornynan keıingi bilim berý salasyndaǵy yntymaqtastyq týraly kelisim bekitildi. Bul kelisimge 2022 jyly 22 jeltoqsanda Tashkentte qol qoıylǵan. Bul týraly osy aptada «ÓzA» aqparattyq agenttigi habarlaıdy.
Ózbekstandyq basylymnyń málimetinshe, halyqaralyq kelisimdi júzege asyrýǵa jaýapty quzyretti organ retinde Joǵary bilim, ǵylym jáne ınnovatsııalar mınıstrligi belgilengen. Mınıstrler kabıneti jáne tıisti mınıstrlik pen vedomstvolardyń basshylary osy halyqaralyq shart kúshine engennen keıin Ózbekstannyń mindettemeleriniń oryndalýyn qamtamasyz etedi.
Sondaı-aq osy aptada «ÓzA» aqparat agenttiginde «Tashkent oblysynda orta ǵasyrlarǵa tıesili qundy zattar tabyldy» degen taqyryptaǵy aqparat jarııalandy.
Atalǵan BAQ-tyń málimetinshe, Tashkent oblysynyń Bóke aýdanynda jumyrtqa tárizdi 2 dóńes jáne 2 dana orta ǵasyrlarǵa tıesili arheologııalyq eskertkish tabylǵan.
«Tabylǵan tarıhı nysandardyń arasynda áıel beınesi bederlengen tasbaqa tárizdes qumyra bar. Mundaı qundy ydys Tashkent oblysynan alǵash ret tabyldy. Ol ejelgi grek dástúri boıynsha jasalǵan. Bul ejelgi «Choch-Tashkent» aımaǵyna Selevkıler kósemi Demodamnyń (b.z.d. III ǵ.) kelýimen baılanysty bolýy múmkin. Qysh ydysta grek qudaıynyń beınesi beınelengen», dep jazady ózbekstandyq basylym.