Qytaı «Tıanven-1» zondyn Marstyń turaq orbıtasyna sátti shyǵardy

BEIJІŃ. QazAqparat – Qytaıdyń «Tıanven-1» zondy Marstyń turaq orbıtasyna sátti shyǵaryldy. Bul týraly sársenbi kúni QHR Memlekettik ǵarysh basqarmasynyń málimetinde aıtyldy, dep habarlaıdy QazAqparat menshikti tilshisi.

«24 aqpanda saǵat 06:29-da qytaılyq «Tıanven-1» orbıtalyq manevr jasaǵannan keıin Marstyń turaq orbıtasyna sátti shyqty», - delingen málimdemede.

Zond quramy orbıtalyq apparat, qoný modýli jáne marsohodtan turady. Roveri bar qoný modýli Marsqa bıylǵy jyldyń mamyr nemese maýsym aılarynda qonýy kerek.

Eske sala keteıik, «Tıanven-1» zondy 2020 jylǵy 23 shildede «Venchan» ǵarysh aılaǵynan «Chanchjen-5» zymyran-tasyǵyshynyń kómegimen ǵaryshqa ushyryldy.

Buǵan deıin QHR ǵaryshtyq basqarý memlekettik komıtetinde málimdegendeı, mıssııanyń ǵylymı maqsattarynyń biri – Mars betiniń morfologııasy men geologııalyq sıpattamalaryn, atmosferalyq ıonosferany jáne qorshaǵan ortanyń tabıǵatyn, fızıkalyq órister jáne planetanyń ishki qurylymyn zertteý.

Eske sala ketsek, 19 aqpan kúni Amerıkanyń Aeronavtıka jáne ǵarysh keńistigin zertteý jónindegi ulttyq basqarmasy (NASA) Marsqa Perseverance (Perseverans) roverin qondyrdy. Roverdiń Qyzyl ǵalamshardaǵy basty mindeti –tirshilik belgisin izdeý.

Keıinnen NASA marsohodtyń Qyzyl ǵalamshar betine qonǵan áserli vıdeosyn jarııalady.