Qytaı sýpermarketterinde qazaqstandyq ónimder buryshy ashylady

SIANЬ. QazAqparat – Qytaıdyń Sıan qalasynda ótken Qazaqstannyń saýda-ekonomıkalyq mıssııasy barysynda KazakhExport ulttyq eksporttyq saqtandyrý kompanııasy jáne Wuhan Asia Europe Logistics Co halyqaralyq logıstıkalyq kompanııasy yntymaqtastyq týraly memorandýmǵa qol qoıdy, dep habarlaıdy QazAqparat KazakhExport kompanııasynyń baspasóz qyzmetine silteme jasap.

Taraptar qazaqstandyq ónimdi Qytaı naryǵynda ilgeriletý jónindegi is-sharalardy birlesip uıymdastyrýǵa kelisti.

«Strategııalyq qujat Qazaqstan men Qytaı kompanııalary arasyndaǵy birlesken jumystyń tıimdiligin arttyrýǵa, tyǵyz kommertsııalyq qatynastardy damytýǵa jáne Qytaıǵa daıyn qazaqstandyq ónimniń shıkizattyq emes eksportynyń kólemin ulǵaıtýǵa baǵyttalǵan», - dedi QHR-daǵy KazakhExport óńirlik dırektory Sergeı Salmanov.

Memorandýmǵa sáıkes «Ýhan Hanoý» qazaqstandyq ónimdi ımporttaıdy jáne ony Hýbeı provıntsııasy men Qytaıdyń saýda jelilerinde taqyryptyq bólimder arqyly, qazaqtyń ulttyq stılinde mamandandyrylǵan stendter ornata otyryp satady. Kompanııa qazaqstandyq taýarlar men KazakhExport múmkindikterin el aýmaǵynda ilgeriletýge qoldaý kórsetedi.

Qazaqstannyń ulttyq eksporttyq saqtandyrý kompanııasy otandyq óndirýshilermen baılanys ornatýǵa jáne ımporttaýshylardy qyzyqtyratyn ónimdi izdeýge járdemdesedi. Sondaı-aq, qazaqstandyq eksporttaýshylar úshin qajetti saqtandyrý men qarjylandyrýdy qamtamasyz etedi.

Taraptar qazaqstandyq taýarlardyń jergilikti tutynýshylar arasynda joǵary suranysqa ıe bolatynyna senim bildirdi. QHR-ǵa maı-tońmaı, makaron, kondıterlik ónimderdi, sýsyndar men basqa da taýarlardy jetkizý jóninde ýaǵdalastyqqa qol jetkizildi.

Jyl basynan beri 53 mlrd teńgege eksporttyq kelisimsharttar bekitilgen. Qytaıdyń 11 ımporttaýshysymen un jáne kúnbaǵys dánin jetkizý boıynsha 17 kelisimshart jasalǵan.

Aıta ketsek, 2019 jyly KazakhExport jáne Wuhan Asia Europe Logistics Co yntymaqtastyǵy aıasynda Ýhan qalasynda qazaqtyń ulttyq stılinde bezendirilgen alǵashqy taqyryptyq bólim ashylǵan edi. Alaıda, pandemııaǵa baılanysty yntymaqtastyq toqtaǵan bolatyn.

«Ýhan Hanoý» - Han Xin Ou halyqaralyq marshrýttyq poıyzdaryna arnalǵan QHR memlekettik temirjol júk platformasy. Hýbeı provıntsııasynyń ondaǵan qalasynda zamanaýı ámbebap dúkenderi, saýda ortalyqtary, sýpermarketteri bar. Sondaı-aq, ımport baǵytynda kólik logıstıkasy men keń dıstrıbıýterlik jelisi jolǵa qoıylǵan. Kompanııany Ýhan úkimeti sýbsıdııalaıdy jáne ol – «Bir beldeý – bir jol» saıasatynyń múshesi.