Qytaı spartakıadasynda 4 qandasymyz júldeger atandy

ASTANA. QazAqparat - XIII kezekti jazǵy Jalpy qytaı spartakıadasy óz máresine jetip, 4 shyńjańdyq qazaq sportshysy jeńis tuǵyrynan kórindi, dep habarlaıdy QazAqparat tilshisi.

Baıraqty básekede Qytaıdaǵy qazaq balýandary úsh medal enshiledi.

Erkin kúresten 65 kg salmaqta óner kórsetken qandasymyz Erlanbek Káteıuly altyn medal jeńip alsa, grek-rım kúresinen 59 kg salmaqta Ýálıhan Serikuly jáne 130 kg salmaqtaǵy Muratbek Sháısultanuly qola júldeni ıelendi.

Bokstan 75 kg salmaqta synǵa túsken Toqtarbek Tańlathanuly kúmis medal enshiledi.

Buǵan deıin habarlaǵanymyzdaı, tóreshilerdiń Toqtarbekke jasaǵan ashyq ádiletsiz sheshiminen keıin, Qytaı Memlekettik sport bas basqarmasy tóreshilerdi jazalap, bokstan ulttyq quramany taratyp jibergen edi.

Aıta keteıik, Erlanbek Káteıuly 2013 jyly XII kezekti spartakıadada chempıon atanyp, Qytaı atynan 2016 jylǵy Rıo Olımpıadasyna qatysqan bolatyn.