Qytaı shekarasyndaǵy tekserý: bıýdjetke 45,1 mlrd teńge óndirildi

NUR-SULTAN. QazAqparat - Qytaımen kedendik shekarada tártip ornatýǵa qatysty Memleket basshysynyń tapsyrmasyn oryndaý aıasynda júrgizilgen teserýler nátıjesinde búgingi tańda 10 ýákiletti ekonomıkalyq operatorlardan bıýdjetke 45,1 mlrd teńge óndirildi. Bul týraly QR QM Memlekettik kirister komıtetinde habarlady.

2022 jyldyń aqpan-mamyr aılarynda memlekettik kirister organdary 10 ýákiletti ekonomıkalyq operatorǵa qatysty jospardan tys kóshpeli kedendik tekserýler júrgizgen bolatyn.

Kedendik tekserý nátıjeleri boıynsha 107,7 mlrd teńge mólsherinde kedendik tólemder, salyqtar men ósimpuldar qosymsha esepteldi. Ýákiletti ekonomıkalyq operator taýarlardyń kedendik qunyn durys tómendetip kórsetý arqyly kedendik tólemder men salyqtardy tóleýden jaltarmaq bolǵan.

Anyqtalǵan buzýshylyqtar faktileri boıynsha memlekettik kirister organdary prokýratýra jáne sybaılas jemqorlyqqa qarsy qyzmet organdarymen birlesip memleket bıýdjetine 45,1 mlrd teńge mólsherinde kedendik tólemder, salyqtar men ósimpuldar somasyn óndirip aldy.

Qazirgi ýaqytta memlekettik kirister organdary ýákiletti ekonomıkalyq operatorlarǵa jáne kedendik tólemder men salyqtardy tóleý boıynsha ortaq mindet atqaratyn keden ókilderine qatysty bereshekti óndirip alý sharalaryn qabyldaý boıynsha jumysty jalǵastyrýda.