Qytaı óziniń jeke jahandyq navıgatsııalyq júıesin iske qosyp jatyr

SIChAN. QazAqparat  - Búgin Astana ýaqytymen 00.07-de QHR Sychýan provıntsııasynyń ońtústik-batysynda Sıchan ǵarysh aılaǵynan eki navıgatsııalyq serigi bar Chanchjen-3B zymyran-tasyǵyshy ushyryldy, dep habarlaıdy Qytaıdaǵy «QazAqparat» HAA menshikti tilshisi oqıǵa ornynan.

Beidou jahandyq navıgatsııalyq júıesiniń serigin ushyrýǵa sheteldik jýrnalısterdi alǵash ret kirgizdi.

«Bul serikter Beidou-3 serııasynyń 18 jáne 19-shy serikteri. Bul spýtnıkter joǵary sapaly sıgnaldy qamtamasyz ete alady jáne jańa fýnktsııalarmen jabdyqtalǵan. Atap aıtqanda, spýtnıkter arasyndaǵy baılanysqa qoldaý kórsete alady, izdestirý jáne qutqarý jumystaryn baqylaıdy jáne t.b. Sonymen qatar, jańa spýtnıktiń qyzmet kórsetý merzimi 10-12 jyldy quraıdy. Burynǵy serikterdiń merzimi 8 jyldan edi. Jalpy, bul ushyrylym Beidou-3 júıesiniń negizgi tireginiń orbıtada ornalasýynyń jáne jahandyq  qyzmet kórsetý jelisin qalyptastyrýǵa kóshýdi aıaqtaýdy bildiredi», - dedi Qytaı júıelik spýtnıktik navıgatsııalardy basqarý keńsesiniń jetekshisi Jan Chentsı.

Onyń aıtýynsha, «Beidou-3» spýtnıkteri bar navıgatsııalar júıesi 2018 jyldyń sońynda qoldanysqa engiziledi jáne «Bir beldeý, bir jol» bastamashy elderine qyzmet kórsetýge kirisedi. Al, 2020 jyldan bastap búkil álemdegi abonentterge qyzmet kórsetpek.