«Qytaı - Ortalyq Azııa» forýmynda Qazaqstan men Qytaı yntymaqtastyǵyna erekshe mán berildi

BEIJІŃ-LıANЬıÝNЬGAN. QazAqparat -  Qytaı Halyq Respýblıkasy Tszıansý provıntsııasynyń Lıanıýngan qalasynda besinshi «Qytaı - Ortalyq Azııa» forýmy ótti, dep habarlaıdy «QazAqparat» HAA tilshisi.

Sharaǵa Qytaı halyqtyq saıası konsýltatıvtik keńesiniń Búkilqytaılyq komıtet tóraǵasynyń orynbasary, Búkilqytaılyq ónerkásip jáne saýda qaýymdastyǵynyń tóraǵasy Van Tsınmın, Ózbekstan Respýblıkasy premer-mınıstriniń birinshi orynbasary Achılbaı Ramatov, Tájikstan Respýblıkasy premer-mınıstriniń orynbasary Azım Ibrohım, Qyrǵyz Respýblıkasy kólik jáne jol mınıstriniń orynbasary Azımkan Jýsýbalıev, Qytaıdaǵy Túrikmenstan elshisi Chınar Rýstamova, Tszıansý provıntsııasynyń gýbernatory Ý Chjenlýn, QHR Syrtqy ister mınıstriniń kómekshisi (mınıstrdiń orynbasary shenindegi) Lı Hýeılaı, QHR men Ortalyq Azııanyń ǵylymı jáne iskerlik salasyndaǵy ókilderi qatysty.

Qazaqstandyq delegatsııany Qytaıdaǵy Qazaqstannyń elshisi Shahrat Nuryshev bastap bardy. Óz kezeginde ol qazirgi ýaqytta Lıanıýngan portyndaǵy qazaqstandyq-qytaılyq termınal eń mańyzdy strategııalyq toraptardyń biri ekenin atap ótti. Bul tranzıt Qazaqstannyń tranzıttik-kóliktik áleýetin arttyryp, Azııa - Tynyq muhıty aımaǵynyń naryǵynda qazaqstandyq eksporttyń baǵdaryn qalyptastyrady.

Shahrat Nuryshev óz sózinde 2020 jylǵa qaraı Lıanıýngan qazaqstandyq-qytaılyq termınalyna 500 myń jıyrmafýttyq ekvıvalent (TEU) mólsherinde konteınerlik júk ákelý josparlanyp otyrǵanyn habarlady.

«Aldaǵy jyldary Qazaqstan aýmaǵy arqyly Sankt-Peterbýrg pen Lıanıýngan qalasyn, «Qytaı - Qazaqstan - Reseı - Eýropa», «Qytaı - Qazaqstan - Túrikmenstan - Iran» jáne «Qytaı - Qazaqstan - Ortalyq Azııa» temir joldaryn baılanystyratyn «Batys Eýropa - Batys Qytaı» halyqaralyq avtokóliktik dálizi Jibek jolynyń eń mańyzdy marshrýtyna aınalyp, aımaqtaǵy kórshilerdiń ortaq qoldanysyna paıdalanylatyn bolady», - deıdi qazaqstandyq dıplomat.

Búkilqytaılyq ónerkásip jáne saýda qaýymdastyǵynyń tóraǵasy Van Tsınmın Qazaqstan men Qytaı arasyndaǵy qarym-qatynasty memleketaralyq ózara seriktestiktiń jarqyn úlgisi dep atady. Ol ındýstrııalandyrý jáne ınvestıtsııa salasynda quny 28 mlrd dollarlyq 51 jobanyń iske asyrylýy týraly eske salyp, Lıanıýngan portyndaǵy qazaqstandyq-qytaılyq logıstıkalyq termınaldyń mańyzdylyǵyn atap ótti.

Forým aıasynda Lıanıýngan qalasynyń saýda-ekonomıkalyq jáne týrıstik áleýeti tanystyryldy.