Qytaı men Vetnam shekarasynda 6 myńnan astam júk kóligi tur

BEIJІŃ. QazAqparat – Qytaı shekarasyna kireberiste, ıaǵnı Vetnamnyń soltústik óńirlerindegi ótkizý pýnkterinde 6 myńnan astam júk kóligi qańtarylyp tur. Mundaı málimetti Viet Nam News eldiń keden qyzmetine silteme jasap taratty, dep habarlaıdy «QazAqparat» HAA tilshisi.

Basylymnyń jazýynsha, búgingi kúni vetnam-qytaı shekarasyndaǵy ótkizý pýnkterinde kezekte turǵan júk kólikteriniń sany 6200-ge jýyqtady. Shekaradan ótkizýdegi shekteýler bıylǵy jyldyń sońynda Qytaıdyń koronavırýstyń aldyn alý jáne baqylaý boıynsha engizgen is-sharalarymen baılanystyrylyp otyr.

Nikkei málimetinshe, Qytaı tarapy Ońtústik-Shyǵys Azııa elderimen, sonyń ishinde Vetnammen transshekaralyq saýda aǵynyna shekteý engizgen. Shekteýler taıaý aılarda Qytaıda ótýi josparlanǵan iri sharalar – aı kúntizbesi boıynsha Jańa jyl jáne Beıjińdegi qysqy Olımpıada oıyndary aldynda koronavırýstyń taralýyna tosqaýyl qoıýǵa baǵyttalǵan.

Avtory: Rýslan Súleımenov