Qytaı men Reseıde ýtıl alymy Qazaqstannan áldeqaıda joǵary - Ásemqan Dosqujanov

ALMATY. QazAqparat - «SemAz» zaýytynyń bas dırektory Ásemqan Dosqujanov Qazaqstanda ýtılızatsııa alymynyń 50 paıyzǵa tómendeýine qatysty pikir bildirdi, dep habarlaıdy QazAqparat tilshisi.

«Biz avtobýs shyǵaramyz. Úlken 12 metrlik avtobýs úshin ýtılızatsııalyq alym 3 210 000 teńge bolsa, qazir ol 50% tómendedi, bul – 1 600 000 teńge. Aıtarlyqtaı aıyrmashylyq bar. Biz jumysty jalǵastyramyz. Avtobýs sanyn arttyramyz. Osyǵan daıyndalyp jatqan edik», – deıdi Ásemqan Dosqujanov.

Sonymen qatar, ol Qytaı men Reseıde ýtılızatsııalyq alym Qazaqstanǵa qaraǵanda áldeqaıda joǵary ekenin basa aıtty.

Spıker báseke bolýy kerek dep esepteıdi.

Onyń aıtýynsha, koronavırýs pandemııasynyń saldarynan avtobýs óndirisi quldyrap, jylyna shamamen 300-400 kólik shyǵarylady.

«Bıyl logıstıkalyq máseleler sheshilip, shekara ashylsa, 200 úlken jáne 300 shaǵyn avtobýs shyǵarýdy josparlap otyrmyz. Biz Ortalyq Azııaǵa, Qıyr Shyǵysqa nazar aýdarǵymyz keledi. Bizdiń «Daewoo» markaly avtobýstarymyz Vladıvostok, Habarovsk, Irkýtsk qalalarynda suranysqa ıe», - dep qosty ol.

Sondaı-aq Ásemqan Dosqujanov jumysshylardy qysqartpaıtynyn tilge tıek etti.

Qazir zaýytta 450-ge jýyq adam jumys isteıdi.

Eske salaıyq, búgin QR Premer-Mınıstriniń birinshi orynbasary Roman Sklıar avtokólik jáne aýyl sharýashylyǵy tehnıkasyna kádege jaratý alymy 50 paıyzǵa deıin tómendeıtinin málim etti.