Qytaı men Qazaqstan tsıfrlandyrý salasynda yntymaqtaspaq

BEIJІŃ. QazAqparat - Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýy QR men QHR arasyndaǵy tsıfrlandyrý jáne «aqyldy» tehnologııalar salasyndaǵy yntymaqtastyqqa keń jol ashady. Bul týraly QHR Reforma jáne damý isteri jónindegi memlekettik komıtet (RDMK) tóraǵasynyń orynbasary Nın Tszıchje (Ning Jizhe) aıtty, dep habarlaıdy Qytaıdaǵy «QazAqparat» HAA menshikti tilshisi.

«Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýyn zerttep, ónerkásiptik ınnovatsııalardy, jasyl ekonomıkany jáne basqa da aldyńǵy qatarly salalardy damytý boıynsha sizdiń elińizdiń mańyzdy josparlaryna nazar aýdardyq. Biz adamzattyń ındýstrııalyq salada reformany talap etetin jańa kezeńge aıaq basqanyna kelisemiz», - dedi ol búgin ótken Qazaqstan-Qytaı ındýstrıalızatsııa men ınvestıtsııa salasyndaǵy yntymaqtastyq boıynsha birlesken komıssııanyń 14-shi otyrysynda.

RDMK pikirinshe, Nın Tszıchje Qazaqstanda júrgizilip jatqan reformanyń erekshelikteri retinde ındýstrııalandyrý máselesin Internet, «jasyl» jáne «aqyldy» tehnologııalar, jalpy alǵanda ekonomıkany tsıfrlandyrýmen tyǵyz baılanystyrý dep atady.

«Qytaı da Qazaqstan sekildi ekonomıkanyń osy baǵyttaryn damytýǵa basa nazar aýdarýda - bizde «Qytaıda jasalǵan - 2025» jáne «Internet+» baǵdarlamalary ázirlengen. Qazir qytaılyq smart-tehnologııalar álemde aldyńǵy oryndarǵa shyǵa bastady. Biz óz tájirıbemizben bólisýge, sondaı-aq Qazaqstandaǵy óndiristik qýattardy damytýdyń birlesken baǵdarlamasyndaǵy tsıfrlandyrý jáne «aqyldy» tehnologııalar salasyndaǵy jobalarǵa qosylýǵa daıynbyz», - dep atap ótti ol.