Qytaı mamandyqtar tizimin 158 jańa kásip túrimen tolyqtyrdy

BEIJІŃ. Sınhýa-QazAqparat – 2015 jyldan beri Qytaıda memleket moıyndaǵan mamandyqtar tizimine 158 jańa kásip túri qosyldy. Bul týraly Qytaı Halyq Respýblıkasynyń Eńbek resýrstary jáne áleýmettik qamsyzdandyrý mınıstrligi málimdedi, dep habarlaıdy QazAqparat «Sınhýa» agenttigine silteme jasap.

Mınıstrlik málimetinshe, jańa kásip túrlerin qosa alǵanda, jaqynda naqtylanǵan tizimdegi mamandyqtardyń jalpy sany 1 639 boldy.

Jańartylǵan tizimde tsıfrlyq sektorlarǵa qatysty 97 mamandyq bar. Sondaı-aq, krıptografııalyq ınjenerııa, parnıktik gazdar shyǵaryndylaryn retteý jáne qarjylyq tehnologııalar sııaqty elde damyp kele jatqan salalarǵa qatysty kásipter de engizilgen.

Mınıstrlikten atap ótkendeı, elde jańa mamandyqtardyń ulttyq standarttaryn ázirleý jáne mamandardy kóptep daıyndaý úshin kásiptik oqytý kýrstaryn ashýǵa kúsh salyndy.

Agenttik habarlaǵandaı, Qytaıda tsıfrlyq ekonomıka sátti damyp keledi. 2021 jyldyń aıaǵynda onyń kólemi 45,5 trıllıon ıýanǵa (shamamen 6,4 trln dollar) jetti.

Foto: Cfoto/Keystone Press Agency