Qytaı qyzy qazaqsha bilmeıtin qandastarymyzdy uıaltty
«Men Quljada týyp-óstim. Qulja - qazaqtardyń qalasy. Qazaqstan táýelsizdik alǵan jyly anam: «Endi qazaq tili de shet tili. Seniń qazaqsha bilýiń kerek», - dep meni Qulja qalalyq Qazaq bastaýysh mektebine oqýǵa berdi», - deıdi Qytaı telearnalarynyń birine suhbat bergen tilshi qyz. Shın Rynnyń qazaqsha úırenýi ońaı bolmaǵan. Árıne, óz tili emes, onyń ústine, tilin syndyrýǵa kómektesetin ata-anasy da qazaqsha bilmeıdi. «Qazaq tilin úırenýim qıyn boldy. 1-synypta áripterdi úırengende talaı qyzyq oqıǵaǵa keziktim. Áriptiń ornyna san jazǵan kezderim, sóılem quraǵanda jalǵaý men jurnaqtan shatasyp qınalǵan sátterim kóp kezikti», - deıdi ol.
Shın Rynnyń qazaqshasyna qarap ony qazaq qyzy dep qalatyndar kóp eken. Astana men Almaty qalalarynda jýrnalıstik qyzmetpen júrgen hanzý qyzy qazaq elinen talaı qyzyqty reportaj jasaǵan. Arqanyń aq borany men Almatynyń shýaqty jazy Shın Rynniń sıýjetimen kórshige tikeleı tarap jatty.
«Astana kún saıyn damyp jatqan qala. Almaty - álemdegi eń kórkem qala. Men qazaq tilin meńgerip osy elde, osy ásem qalalarda jumys istegenime maqtanamyn. Onyń ústine qazaq degen darqan halyq qoı. Qazaqtyń minezi dalasy sııaqty keń, mol. Meni qazaqtyń jeri, eli tartty. Qazir bul elden kete almaıtyn sııaqtymyn», - deıdi han qyzy.
Shın Rynnyń boıynda qazaqtyń minezi bar, ony Beıjińdegi rejısserleri aıtypty. «Astanadan tikeleı efır júrgizip turǵam. Rejısserim: «Sen boıyńdy jınaqy usta», - dep eskertti. Óıtkeni, Qytaıda telejýrnalıstıka degen zaýyt mashınasy sııaqty, bir toqtamaı júrip turady. Tilshileri de tas-túıin. Al men munda tikeleı efırdi júrgizgende sondaı erkin, asyqpaı júrgizgem. Sol sáttegi beınemnen Qazaqstanda, qazaqtardyń arasynda turǵanymdy baıqaý qıyn emes edi», - deıdi tilshi qyz.
Shın Rynniń qazaqshasyna qarap, ana tilin bilmeıtin qarakóz qyzdarǵa, jıyrma jyldan beri qazaq tilin úırene almaı júrgen otandastarymyzǵa jany ashıdy eken. Mıllıardtardyń elinen kelip, qazaqsha saırap, qazaqtyń salt-dástúrin, eli men jerin, saıasatyn shyǵystaǵy kórshige kórsetip júrgen mundaı han qyzynan qalaı aınalmaısyń! Shirkin, osy tilshi qyzdyń qazaq tiline degen qurmeti, mahabbaty ana tilin bilmeıtin qarakóz baýyrlarymyz ben qyzdarymyzǵa sabaq bolsa ǵoı. Átteń, bul da Sheraǵa aıtatyn «Bir kem dúnıe» ǵoı.