Qytaı quramasyndaǵy qazaq boksshysy álem chempıonatynda qarsylasyn nokaýtpen utty

ASTANA. QazAqparat – Tashkent qalasynda bokstan erler arasynda ótip jatqan álem chempıonatynda Qytaı quramasynda óner kórsetetin Toqtarbek Tańathan shırek fınalǵa shyqty, dep habarlaıdy QazAqparat tilshisi.

Qazaq jigiti 80 kelige deıingi salmaqta mysyrlyq Abdelgavvad Salahpen sheberlik baıqasty.

Qytaılyq boksshy qarsylasyn ekinshi raýndta nokaýtpen jeńdi.

Bul – Toqtarbek Tańathannyń osy chempıonattaǵy úshinshi jekpe-jegi. Osyǵan deıin ol áýeli armenııalyq Ambartsým Akopıandy upaı sanymen utsa, sodan keıin marokkolyq Mohamed Assagırdi nokaýtpen jeńgen edi.

Toqtarbek jartylaı fınalǵa shyǵý úshin kýbalyq, eki dúrkin olımpıada chempıony Arlen Lopespen talasady.

Eske sala keteıik, budan buryn bokstan ulttyq qurama kapıtany Aslanbek Shymbergenovtiń shırek fınalǵa shyqqanyn jazǵan edik.

Sondaı-aq Nurbek Oralbaı shırek fınalǵa joldama aldy.

Mahmud Sabyrhan ekinshi jeńisine qol jetkizdi.