Qytaı kompıýter oıyndaryn tikeleı efırden ruqsatsyz kórsetýge tyıym saldy

BEIJІŃ. QazAqparat – Mundaı sheshimdi Qytaı kommýnıstik partııasy Ortalyq komıteti radıo jáne telearna bas basqarmasy qabyldady, dep habarlaıdy QazAqparat Qytaı ulttyq radıo jáne telearna ákimshiliginiń saıtyna silteme jasap.

Qytaı retteýishiniń málimetinshe, bul tyıym kompıýterlik oıyndar arqyly tikeleı efırde taratylatyn qatygezdikpen jáne jasóspirimderdiń oıyn táýeldiligimen kúresýge baǵyttalǵan.

«Quzyretti organdardyń arnaıy ruqsatynsyz kompıýterlik oıyndardy ınternette jáne aýdıovızýaldy jelilerde taratýǵa qatań tyıym salynady. Osyǵan baılanysty zańsyz oıyn kontentin kórsetý úshin fılmder men telehıkaıalardy, estradalyq shoýlardy, beıne aǵyndary men qysqa beıne qyzmetterdi paıdalanýǵa bolmaıdy», - delingen jarııalanymda.

Sondaı-aq, bılik strımerlerdiń tártibi krıterıılerin qalyptastyrýǵa umtylyp jatqany aıtylǵan.

«Etıkalyq normany buzatyndardyń tikeleı efırdi paıdalanýyna jáne olardyń ekranda kórsetilýine qatań tyıym salynady. Mundaı adamdardyń ekranda kórinýi qadaǵalanady», - dep jazylǵan qujatta.

Budan basqa, paıdalanýshylardyń oıyn kontentine trafıgin ulǵaıtýǵa tyıym salyndy jáne ınternet-platformalarǵa kámeletke tolmaǵan paıdalanýshylardy qorǵaý tetigin qalyptastyrýǵa nusqaý berildi.

Eske salaıyq, buǵan deıin Qytaı úkimeti oqýshylarǵa jumys kúnderi (juma, senbi, jeksenbini qospaǵanda) vıdeo oıyn oınaýǵa tyıym saldy.