Qytaı keler jyly Marsqa zond ushyrmaq

ASTANA. QazAqparat - Qytaı 2020 jyly Marsqa óziniń alǵashqy zondyn ushyrýdy josparlap otyr. Onyń egjeı-tegjeıin Qytaıdyń Aıdy barlaý baǵdarlamasynyń bas ınjeneri Vý Veı Ren aıtyp berdi, dep habarlaıdy «QazAqparat» HAA chinanews-ke siltememen.

Qytaı ushyrmaq bolyp otyrǵan zond Mars orbıtasyna shyǵyp, keıin Qyzyl ǵalamsharǵa qonady. Qytaılyqtar osy zond Mars betin tolyqqandy zertteıdi dep úmittenip otyr.

Vý Veı Renniń aıtýynsha, Qytaı «Change 5» baǵdarlamasyn qaıta qolǵa alyp, bıyl jeltoqsanǵa deıin zondty Aıǵa ushyrmaq. Eger ol Aı betinen alynǵan úlgilerdi jınap, Jerge sátti oralsa, Qytaı AQSh jáne burynǵy Keńes Odaǵynan keıingi osy tehnologııany ıgergen úshinshi el atanady.

Marsqa qatysty zertteý jumystaryn júrgizý ári týrısterdi tartý maqsatynda jýyrda Qytaıdyń alǵashqy Mars sımýlıatsııalyq lageri resmı túrde paıdalanýǵa berildi. Lager Tshınhaı provıntsııasynyń Haısı oblysyndaǵy Leńhý eldi mekeninde ornalasqan. Bul aımaqtyń geomorfologııalyq erekshelikteri Marsqa óte jaqyn. 80 akrdan turatyn lagerde 160 adamǵa arnalǵan uıyqtaıtyn kabınalar men shatyrlar bar. Tutastaı alǵanda, lagerde Mars betindegige barynsha uqsas jaǵdaı jasalǵan.

Qytaı Jańalyqtar aqparattyq agenttiginiń habarlaýynsha, bılik 2017 jyly 150 mıllıon ıýan qarajat bólip, týrıstik baza qurý maqsatymen «Leńhý Mars qalashyǵy» atty jobany iske asyrýǵa kirisken.

Jurttyń ıgiligine berilgen lagerdegi zertteýshilerge arnalǵan astronomııalyq qondyrǵylar aldaǵy ýaqytta Marsqa jiberiletin ekspedıtsııany synaqtan ótkizýge múmkindik beredi.

Lagerdiń ashylý saltanatynda «Marsqa qonýdyń modeli» eksperımenti de uıymdastyrylǵan. Alaıda, tehnıkalyq aqaýlarǵa baılanysty synaq sátsiz aıaqtalǵan.