Qytaı Qazaqstan arqyly Eýropaǵa jańa aralas júk baǵytyn iske qosty

BEIJІŃ. QazAqparat – Qytaıdyń soltústiktegi Sıan qalasynan Germanııanyń Mangeım qalasyna jańa júk poıyzy baǵyty iske qosyldy. Uzyndyǵy 11,3 myń shaqyrymdy quraıtyn jol Qazaqstan arqyly ótedi, onyń ishinde Kaspıı men Qara teńizderdi kesip ótedi, dep habarlaıdy QazAqparat menshikti tilshisi.

42 konteıner tıelgen alǵashqy quram sáýir aıynyń ekinshi onkúndiginde Sıan qalasynan shyqty. Jańa baǵyt – aralas, ıaǵnı temirjol jáne teńiz júk tasymaly. Ol Germanııanyń Mangeım qalasyna kelgenge deıin Qazaqstan, Ázerbaıjan, Grýzııa, Ortalyq jáne Shyǵys Eýropa elderi arqyly ótedi.

Jańa baǵyt Sıan men Eýropadaǵy logıstıkalyq habtar arasynda júretin 16-shy júk poıyzy.

Eske sala keteıik, «Qytaı-Eýropa» baǵyty boıynsha alǵashqy júk poıyzy Sıan qalasynan 2013 jyly jolǵa shyqqan bolatyn. 2022 jyldyń birinshi toqsanynyń qorytyndysy boıynsha Sıan Eýropaǵa barlyǵy 790 júk poıyzyn jóneltken.

Bıylǵy jyldyń aqpan aıynda Tsındao teńiz portynan (Shandýn provıntsııasy, Shyǵys Qytaı) Qazaqstan arqyly Germanııaǵa júk poıyzdarynyń jańa baǵyty iske qosylǵan bolatyn. Ol kezde de sońǵy pýnkt retinde Mangeım qalasy belgilengen edi.

Qytaılyq logıstıkalyq kompanııalardyń málimeti boıynsha, 2021 jyly Shandýn provıntsııasynda «Qytaı-Eýropa» baǵytyndaǵy 1,8 myńnan astam júk poıyzy óńdelgen.

Germanııanyń Federaldyq statıstıkalyq basqarmasynyń statıstıkasy kórsetkendeı, Germanııa men Qytaı arasyndaǵy saýda aınalymynyń kólemi 2021 jyly aldyńǵy jylmen salystyrǵanda 15,1 paıyzǵa artyp, 278,5 mıllıard dollardy quraǵan.