Qytaı qazaǵy bokstan álem chempıonatynda ekinshi jeńisine qol jetkizdi

TAShKENT. QazAqparat – Ózbekstan astanasy Tashkentte erler arasynda ótip jatqan bokstan álem chempıonatynda Qytaı quramasyndaǵy qazaq jigiti Danabek Baıǵazy ekinshi jeńisine qol jetkizdi, dep habarlaıdy QazAqparat tilshisi.

Danabek Baıǵazy asa aýyr salmaqta 1/8 fınalda mysyrlyq ıÝsrı Hafez Rezkpen kezdesti.

ıÝsrı Hafez Rezk – Tokıo olımpıadasyna qatysqan boksshy, Afrıka jáne Afrıka oıyndarynyń chempıony, sondaı-aq Jertora teńizi oıyndarynyń eki dúrkin jeńimpazy.

Tartysty ótken jekpe-jekte tóreshiler basym daýyspen jeńisti qytaılyq boksshyǵa berdi.

Osylaısha, Danabek Baıǵazy shırek fınalǵa shyqty.

Ol birinshi jekpe-jeginde álem chempıonatynyń kúmis júldegeri, armenııalyq Davıd Chaloıandy joldan taıdyrǵan edi.

Asa aýyr salmaqta qazaqstandyq Qamshybek Qońqabaev shırek fınalda bokstan olımpıada jáne álem chempıony, ózbekstandyq Bahodır Jalolovpen judyryqtasady.

Eske sala keteıik, budan buryn Sáken Bıbosynovtyń bokstan álem chempıonatynda jeńilip qalǵanyn jazǵan bolatynbyz.

Sondaı-aq Serik Temirjanov pen Nurqanat Raıys shırek fınalǵa shyqty.

Qazaqstan boks federatsııasy Sáken Bıbosynovtyń jekpe-jegine qatysty shaǵym joldady.

Qazaqstan quramasynan úshinshi bolyp Qamshybek Qońqabaev shırek fınalǵa ótti.