«Qytaı – Eýropa» temirjol baǵyttary «Dostyq – Alashańqaı» ótkeli arqyly ótetin bolady

BEIJІŃ. QazAqparat – QHR «Qytaı – Eýropa» baǵyty boıynsha temirjol júk tasymaly kólemin arttyryp jatyr. Bul týraly Qytaı temirjol kompanııasynyń (China State Railway Group) habarlamasynda aıtylǵan, dep habarlaıdy QazAqparat menshikti tilshisi.

QHR-da temirjol kóligin damytýdyń jańa strategııasy osy demalys kúnderinen bastalady. China State Railway Group málimdemesine sáıkes, jańa strategııa birneshe temirjol jelileriniń jumysyn ońtaılandyrýǵa jáne «Qytaı – Eýropa» habarlamasyna halyqaralyq júk poıyzdaryn qosýǵa múmkindik beredi.

Atap aıtqanda, QHR-dyń iri kólik-logıstıkalyq bazalarynan (Sychýan jáne Gýıchjoý provıntsııalary, Chýntsın megapolısi, Ońtústik-Batys Qytaı) «Dostyq-Alashańqaı» halyqaralyq ótkeli baǵytynda jańa júk baǵyttary engizilýde.

«Qytaı – Eýropa» júk poıyzdarynyń jańa jelileri naryqtyń senimin arttyrady jáne búkil el boıynsha temirjoldardy keńinen qamtý arqyly klıentterge taýarlardy jetkizýge keńirek múmkindik beredi», - dedi Shanhaı logıstıkalyq kompanııasynyń basshysy Tommı Tana.

Qytaı kólik-logıstıkalyq kompanııalary ókilderiniń aıtýynsha, 2022 jyldyń birinshi toqsanynda «Qytaı – Eýropa» halyqaralyq temirjol marshrýttary boıynsha (ótken jyldyń sáıkes kezeńimen salystyrǵanda 7%-ǵa ósken) 3,6 myńnan astam júk poıyzy jáne jıyrma fýttyq ekvıvalentte (+9%) 350 myń konteıner jóneltilgen.

Qytaılyq sarapshylar muny Eýropadan tapsyrys sany kóbeıgen dep túsindirýde. Taýarlardyń negizgi sanattaryna avtomobıl bólshekteri, elektrondy ónimder jáne transshekaralyq elektrondyq kommertsııa platformalarynda satylatyn taýarlar kiredi.

«Dostyq – Alashańqaı» halyqaralyq ótkeli - Eýropa men Azııa elderi arasyndaǵy saýda-ekonomıkalyq baılanystardy damytýdaǵy mańyzdy ótkel.

Osyǵan deıin Qazaqstan arqyly ótetin tranzıttik júktiń bir bóligi temirjolǵa aýystyrylatynyn habarlaǵan bolatynbyz.

Tımýr Súleımenov