Qytaı COVID-19 qurbandaryn eske aldy

BEIJІŃ. QazAqparat – Búgin Qytaıda koronavırýs pandemııasy saldarynan qaıtys bolǵandar men adamdardyń ómirin saqtap qalý úshin óz ómirin qurban etken dárigerlerdi eske alyp, jalpyulttyq aza tutý kúni dep jarııalandy.

Senbi kúni jergilikti ýaqytpen 10:00-de Qytaı turǵyndary jańa koronavırýs qurbandaryn 3 mınýt únsizdikpen eske aldy. Aza tutý belgisi retinde avtokólikterdiń, poıyzdar men kemelerdiń sırenasy qosyldy.

El boıynsha týlar tómen túsirildi, onyń ishinde sheteldik elshilik mańy, bas konsýldyq jáne halyqaralyq uıym ókildikterindegi týlar da bar.

Qoǵamdyq oıyn-saýyq sharalarynyń bári toqtatyldy. QHR vedomstvolary, ulttyq BAQ men qytaılyq izdeý saıttary koronavırýstyń jańa túrinen qaıtys bolǵandarǵa aza tutyp, aq-qara tústi bezendirýge kóshti.

Ótken táýlikte qurlyqtyq Qytaıda koronavırýstan 4 adam qaza boldy, vırýs juqtyrǵandar sany 19 adamǵa kóbeıdi, 18 adam dertinen aıyqty, dep habarlady QHR Densaýlyq saqtaý isteri boıynsha memlekettik komıtet.

«2020 jyldyń 3 sáýirinde qurlyqtyq Qytaıda koronavırýstyń belgisi joq 64 jańa oqıǵa tirkeldi, onyń 26-sy syrttan ákelingen. Qazirgi ýaqytta 1030 aýrý belgisi joq tasýshy medıtsına qyzmetkerleriniń baqylaýynda», -delingen senbi kúni jarııalanǵan mekeme bıýlleteninde.

Resmı málimet boıynsha, qurlyqtyq Qytaıda ınfektsııa juqtyrǵandardyń jalpy sany 81,6 myń adamnan asty, olardyń 76,7 myńy emdelip shyǵyp, 3326-y ómirden ótti.

Buǵan deıin, 4 sáýir Qytaıda jańa koronavırýs ınfektsııasynan qaza tapqandardy jalpyulttyq aza tutý kúni ekeni habarlanǵan bolatyn.

Rýslan Súleımenov