Qytaı BUU aıasynda arnaıy qor ashýǵa 1 mlrd. dollar bóledi
Bul týraly búgin BUU Bas assambleıasynyń 70-shi mereıtoılyq sessııasynda sóz sóılegen Qytaı Halyq Respýblıkasynyń Tóraǵasy Sı Tszınpın aıtty.
«Men osy múmkindikti paıdalana otyryp, Qytaıdyń kapıtaly 1 mlrd. dollardy quraıtyn BUU aıasyndaǵy «Qytaı men BUU-nyń beıbitshilik pen damý qoryn» ashý týraly sheshimin jarııalaǵym keledi. Ol 10 jyl boıy jumys isteıtin bolady», - dedi Sı Tszınpın.
Sonymen qatar ol BUU-nyń bitimgershilik operatsııalaryna daıyndyq jónindegi jańa júıesine qatysýǵa daıyn ekendigin atap ótti. Onyń sózine qaraǵanda, bul maqsatta 8 myń áskerı qyzmetshiden jasaqtalǵan turaqty polıtsııa kontıgenti men kúsh-qýat qurylymdarynyń rezervi qurylatyn bolady.
«Men, munan bólek, aldaǵy 5 jylda Qytaıdyń Afrıkalyq odaqqa daǵdarysty sátterde shuǵyl áreket etýi úshin 100 mln. dollar kóleminde áskerı kómek beretindigin atap ótkim keledi», - dedi ol.