Qytaı bokstan lıtsenzııalyq týrnırdi belgisiz ýaqytqa keıinge shegerdi

NUR-SULTAN. QazAqparat - Qytaıdyń Ýhan qalasynda ótýi tıis bolǵan bokstan Azııalyq kvalıfıkatsııalyq týrnır belgisiz ýaqytqa keıinge shegerildi. Bul týraly QR Ulttyq Olımpıadalyq komıteti jarysty uıymdastyrý komıtetine silteme jasap málim etti, dep habarlaıdy QazAqparat.

«3-14 aqpan aralyǵynda bokstan Azııa/Okeanııa aımaqtyq irikteý týrnıri Qytaıdyń Ýhan qalasynda ótýi tıis bolatyn. Atalǵan týrnırde erler men áıelderdi qosa eseptegende Tokıo Olımpıadasyna 63 lıtsenzııa sarapqa salynatyny kútilgen. Búgin tańerteń akkredıtatsııadan ótken medıa ókilderine arnalǵan hatta irikteý týrnıriniń belgisiz ýaqytqa aýystyrylǵany aıtyldy. Uıymdastyrý komıtetiniń málemdeýinshe, ári qaraıǵy aqparatty Halyqaralyq Olımpıada komıteti taratady», - delingen QR Ulttyq Olımpıadalyq komıtetiniń málimetinde.

Jarystyń keıinge shegerilýine osy kúnderi Qytaıda, sonyń ishinde Ýhan qalasynda belgisiz pnevmonııalyq vırýstyń órshýi sebep bolǵan.

«Ýhan qalasynda pnevmonııanyń asqynýyna sebep bolǵan koronavırýstyń taralýyna baılanysty, adamdardyń densaýlyǵyna nuqsan keltirmeý maqsatynda jergilikti uıymdastyrý komıteti týrnırdi keıinge qaldyrýdy jón kórdi», - delingen hatta.

Aıta ketelik, 2020 jylǵy Tokıo Olımpıadasyna irikteý týrnıri jańa ereje boıynsha ótkiziledi. Oǵan sáıkes, boksshylar tórtjyldyq dodasyna joldama alý úshin qurlyqtyq irikteý dodalarynda baq synaý qajet. 2020 jyldyń aqpany men mamyry aralyǵynda bokstan qurlyqtyq jáne álemdik irikteý týrnırleri uıymdastyrylady. Afrıkadaǵy báseke 2020 jyldyń 20-29 aqpany aralyǵynda Dakarda (Senegal), Eýropadaǵy irikteý syny 13-23 naýryz kúnderi Londonda (Ulybrıtanııa) ótedi. Amerıkalyqtar 23 naýryz ben 3 sáýir aralyǵynda Býenos-Aıreste (Argentına) joldamaǵa talasady. Al álemdik irikteý týrnıri mamyr aıynda Frantsııanyń Parıj qalasynda uıymdastyrylady.