Qytaı bıligi keıbir úndistandyq stýdentterdiń oqýǵa oralýyna ruqsat beredi

BEIJІŃ. QazAqparat - Qytaı bıligi keıbir úndistandyq stýdentterdiń eldegi ýnıversıtetterge oralýyna ruqsat berýge daıyn. Bul týraly QHR Syrtqy ister mınıstrliginiń resmı ókili Chjao Lıtszıan málim etti, dep habarlaıdy QazAqparat menshikti tilshisi.

Ol Qytaı tarapynyń úndistandyq stýdentterdi eldegi ýnıversıtetterge qaıtarý máselesine zor mán beretinin aıtyp, Úndistan tarapymen basqa elderden stýdentterdi qaıtarý protsedýralary jáne tájirıbesimen bólisti.

«Qytaı kóptegen úndistandyq stýdentterge aqparat jınaý úshin Úndistan taraptan biraz ýaqyt qajet ekenin eskeredi. Jalpy, Qytaı tarapy Úndistannan kelgen stýdentterdiń bir bóligin Qytaıǵa oralǵan soń qabyldaýǵa daıyn», - dedi ol.

«Úndistandyq stýdentterdi Qytaıǵa qaıtarý boıynsha jumys is júzinde bastalyp ketti, biz úndi tarapynyń Qytaıǵa qaıtýy kerek stýdentterdiń tizimin berýin kútýdemiz», - dep qosty dıplomat.

Ol qazirgi kúrdeli epıdemıologııalyq jaǵdaıda sheteldik stýdentterdi Qytaıǵa qaıtarý protsesin halyqaralyq epıdemıologııalyq jaǵdaıdyń ózgerýine jáne stýdentterdiń kásibı daıarlyǵynyń erekshelikterine sáıkes úılestirý men ilgeriletý kerektigin aıtty.

Bul prıntsıp barlyq sheteldik stýdentterge qoldanylady. Qytaı Syrtqy ister mınıstrligi úndilik stýdentterdiń Qytaı ýnıversıtetterine oqýǵa oralýy úshin el shekaralaryn ashý ýaqyty týraly tolyq aqparat bergen joq.

«Mende naqty aqparat joq», - dedi Chjao Lıtszıan.

QHR Bilim mınıstrliginiń málimetinshe, 2018 jyly qurlyqtyq Qytaıdaǵy 1004 ýnıversıtette 196 el men aımaqtan 492,1 myńnan astam sheteldik stýdent bilim aldy.

2018 jyly Qytaıda bilim alýshy stýdentterdiń sany jaǵynan alda júrgen 10 el: Ońtústik Koreıa (50,6 myń stýdent), Taıland (28,6 myń), Pákistan (28 myń), Úndistan (23,1 myń), AQSh (20,9 myń), Reseı (19,2 myń), Indonezııa (15 myń), Laos (14,6 myń), Japonııa (14,2 myń), Qazaqstan (11,7 myń).

Buǵan deıin Qytaıda jer silkingenin habarlaǵan bolatynbyz.