Qytaı balýandarynan utylǵan eki qazaqstandyq «qola» aldy - ACh

ASTANA. QazAqparat - Bishkekte ótip jatqan áıelder kúresinen Azııa birinshiliginde eki qazaqstandyq sportshy qola medal jeńip aldy, dep habarlaıdy QazAqparat.

Alǵashqy qola júldeni Irına Kozıýlına (68 keli) jeńip alsa, ekinshini Elmıra Syzdyqova (76 keli) aldy.

68 kelide kúresken Irına Kozıýlına jartylaı fınalda qytaı balýanynan jeńilip, artynsha qola medal úshin bolǵan beldesýde koreıalyq qarsylasynan basym tústi.

Rıo Olımpıadasynyń qola júldegeri Elmıra Syzdyqova (76 keli) da jartylaı fınalda Qytaı balýanynan utyldy. Biraq, qola medal úshin kúreste jigerlilik tanytyp, mońǵol boıjetkeninen aılasyn asyrdy.

Keshe ókinishke qaraı, boz kilemge shyqqan úsh qyzymyz júldesiz qaldy. 50 kelidegi Marına Zakshevskaıa jubanysh beldesýde koreıalyq balýanǵa ese jiberdi. Onyń aldynda Marına úndi balýanynan jeńilgen edi.

55 kelidegi Nazgúl Nurahan Azııa chempıonatyn besinshi orynmen aıaqtady. Qola medal úshin kúreste Nazgúl mońǵolııalyq balýanǵa shamasy kelmedi.

59 kelidegi Nazıra Amanjolova irikteý saıysynda japonııalyq qarsylasynan utylyp, jarystan shyǵyp qaldy.

Endi búgin qalǵan bes salmaqta (53, 57, 62, 65, 72) jeńimpazdar men júldegerler anyqtalady.

Buǵan deıin, Bishkekte ótip jatqan Azııa chempıonatynda grek-rım kúresinen Qazaqstan Ulttyq quramasy 2 altyn, 1 kúmis, 4 qola júlde jeńip alǵan edi.

Esterińizge sala keteıik, Azııa chempıonaty 4 naýryzǵa deıin jalǵasady. Dodaǵa 38 eldiń balýandary qatysýda.