Qytaı azamattarynyń Qazaqstanda 72 saǵattyq vızasyz bolý merzimi 1 shildege deıin toqtatyldy

NUR-SULTAN. QazAqparat - Qytaı azamattarynyń Qazaqstan aýmaǵynda 72 saǵattyq vızasyz bolý merzimi 2020 jyldyń 1 shildesine deıin toqtatyldy. QR Úkimeti búgin resmı saıtynda osy máselege qatysty arnaıy qaýlyny jarııalady, dep habarlaıdy QazAqparat.

Qazaqstan Respýblıkasy Úkimetiniń 2012 jylǵy 21 qańtardaǵy № 148 qaýlysymen bekitilgen Kóship kelýshilerdiń Qazaqstan Respýblıkasyna kelýiniń jáne onda bolýynyń, sondaı-aq olardyń Qazaqstan Respýblıkasynan ketýiniń qaǵıdalarynyń 26-1-tarmaǵynyń qoldanylýyn toqtata turý týraly.

«Quqyqtyq aktiler týraly» 2016 jylǵy 6 sáýirdegi Qazaqstan Respýblıkasynyń Zańy 46-babynyń 1-tarmaǵyna sáıkes Qazaqstan Respýblıkasynyń Úkimeti QAÝLY ETEDІ:

1. Nur-Sultan, Almaty, Shymkent, Aqtaý, Qaraǵandy jáne Taraz qalalarynyń halyqaralyq áýejaılary arqyly tranzıtpen ótetin Qytaı Halyq Respýblıkasynyń azamattary úshin Qazaqstan Respýblıkasyna kelýdiń, bolýdyń jáne odan ketýdiń jetpis eki saǵattyq vızasyz rejıminiń qoldanylýy bóliginde Qazaqstan Respýblıkasy Úkimetiniń 2012 jylǵy 21 qańtardaǵy № 148 qaýlysymen (Qazaqstan Respýblıkasynyń PÚAJ-y, 2012 j., № 29, 388-qujat) bekitilgen Kóship kelýshilerdiń Qazaqstan Respýblıkasyna kelýiniń jáne onda bolýynyń, sondaı-aq olardyń Qazaqstan Respýblıkasynan ketýiniń qaǵıdalarynyń 26-1-tarmaǵynyń qoldanylýy 2020 jylǵy 1 shildege deıin toqtatyla tursyn.

2. Osy qaýly qol qoıylǵan kúninen bastap qoldanysqa engiziledi jáne resmı jarııalanýy tıis.

Qazaqstan Respýblıkasynyń
Premer-Mınıstri A. Mamın