Qytaı atynan Olımpıadaǵa qatysyp jatqan 3 qazaq sportshynyń nátıjeleri qandaı
Naqtyraq aıtsaq, konkı sportynan - Aqnar Adaq, shańǵy sportynan - Baıan Jalyn jáne Qadys Bedelhan synǵa tústi.
Konkıshi Aqnar Adaq - Shynjań ólkesi, Qutybı aýdanynda dúnıege kelgen. Buǵan deıin 2019 jylǵy Qytaı birinshiliginiń 5000 metrlik jarysynda — «altyn», 3000 metrde — kúmis medal alǵan. Halyqaralyq jarystarǵa da qatysyp, júldegerler qatarynan kórinip júr. 2016 jyly Qytaıdyń ulttyq quramasyna qabyldanǵan. Ol osy Olımpıada oıyndarynda 3 qashyqtyqta synǵa túsedi. 5 aqpanda 3000 metrlikte saıysyp, 17-orynǵa ıe boldy. Aıta ketsek, bul qashyqtyqta qazaqstandyq konkıshi Nadejda Morozova jarysty 13-orynmen aıaqtaǵan bolatyn. Aqnar Adaq aldaǵy kúnderi 1500 jáne 5000 metr qashyqtyqta taǵy da muzaıdynǵa shyǵady.
Shańǵyshy Baıan Jalynqyzy - Shyńjań ólkesi, Altaı aımaǵy, Jemeneı aýdanynda dúnıege kelgen. Ulty – qazaq. Qytaı birinshilikteriniń jarystaryna qatysyp, birneshe márte jeńimpaz atanǵan. 2020 jyly Drezdende (Germanııa) ótken Álem kýbogynda 9-oryn alǵan. Keıin Qytaı ulttyq quramasynyń músheligine ótken. Ol Beıjiń Olımpıadasynda 15 shaqyrymdyq skıatlon fınalyna qatysyp, 46-orynǵa ıe boldy. Al bul synda elimizdiń namysyn qorǵaǵan shańǵyshylarymyz Ksenııa Shalygına 48-shi, Angelına Shýryga 49-shy, Valerııa Tıýleneva 51-shi jáne Nadejda Stepashkına 58-shi orynnan kórindi.
Taǵy bir shańǵyshy qandasymyz Qadys Bedelhan Shyńjań ólkesi, Sanjy obylysynda dúnıege kelgen. Qytaı birinshiliginiń jeńimpazy. 2017 jyldan beri Qytaı ulttyq quramasynyń úzdik sportshylarynyń biri sanalady. Ol Beıjiń Olımpıdasynda erler arasynda ótken 30 shaqyrymdyq skıatlon jarysynda máre syzyǵyn 50-shi bolyp kesti. Al Qazaqstan atynan bul synǵa eki shańǵyshy túsken bolatyn. Vıtalıı Pýhkalov tórt jyl burynǵy nátıjesin qaıtalap, 32-shi orynǵa turaqtady. Ol jeńimpazdan 7 mınýt 35 sekýndqa qalyp qoıdy. Ekinshi sportshymyz Evgenıı Velıchko jarysty aıaqtaı alǵan joq.
Eske salsaq, Beıjińdegi qysqy Olımpıada oıyndaryna qatysatyn Qytaı quramasynyń esimderi jarııalandy. Olardyń qatarynda 3 qazaq sportshysy bar.