Qytaı alǵashqy orbıtalyq stantsııasynyń qurylysyn aıaqtaıdy

BEIJІŃ. QazAqparat – Quramynda úsh taıkonavt (Qytaıda ǵaryshkerlerdi osylaı aıtady) bar «Shenchjoý-14» ǵarysh mıssııasy QHR-nyń «Tıangýn» («Aspan saraıy») alǵashqy orbıtalyq stantsııasynyń qurylysyn aıaqtaıdy, dep habarlaıdy QazAqparat menshikti tilshisi Qytaı basqarylatyn ushyrylymdar ǵarysh agenttigine (CMSA) silteme jasap.

CMSA málimetinshe, «Shenchjoý-14» ushyrylatyn ǵarysh mıssııasy negizgi «Tıanhe» modýlinen jáne «Ventıan» jáne «Mantıan» zerthanalyq modýlderinen turatyn bazalyq úshmodýldi qurylymy bar «Tıangýn» orbıtalyq stantsııasynyń qurylysyn aıaqtaıdy.

Bul mıssııanyń ekıpajy alty aı orbıtada bolady. CMSA dırektorynyń orynbasary Lın Sıtsıannyń aıtýynsha, orbıtalyq stantsııa Ulttyq ǵarysh zerthanasyna aınalady.

Bortynda ekıpajy bar «Shenchjoý-14» ǵarysh kemesi osy jeksenbide Qytaıdyń soltústik-batysyndaǵy Tszıýtsıýan ǵarysh aılaǵynan Beıjiń ýaqytymen saǵat 10:44-te ushady. Negizgi modýl orbıtada bir jylǵa jýyq ýaqyt boldy, osy ýaqyt ishinde eki basqarylatyn jáne eki júk ǵarysh kemesin jaqyndastyrý jáne túıistirý, ekıpajdardyń stantsııada birneshe aı bolýy sııaqty mıssııalar aıaqtaldy.

«Tıangýn» ǵarysh stantsııasy 10 jyldan astam ýaqyt boıy 340-450 km bıiktikte jumys isteıdi.