Qysqy Ýnıversıadada Qazaqstan qorjyny taǵy bir medalmen tolyqty

ASTANA. QazAqparat – AQSh-tyń Leık-Plesıd qalasynda ótip jatqan qysqy Ýnıversıadada shańǵyshylar arasynda 15 shaqyrymǵa jappaı start ótti, dep habarlaıdy QazAqparat Sports.kz-ke silteme jasap.

Qazaqstan namysyn 6 shańǵyshy qyz qorǵady: Ksenııa Shalygına, Nadejda Stepashkına, Laýra Qınybaeva, Aısha Raqysheva, Anastasııa Rotova jáne Marııa Lıýft.

Olardyń arasynda úzdik nátıjeni Ksenııa Shalygına kórsetti. Ol dıstantsııa kóshbasshysynan 11,7 sekýnd artta qalyp, «qolaǵa» qanaǵat tutty. Altyn júldeni estonııalyq shańǵyshy Marıel Pýlles jeńip aldy. Kúmis medal Amerıka sportshysy Kendall Kramerge buıyrdy (+0.4 sekýnd).

Aıta keteıik, bul Ksenııa Shalygına úshin Ýnıversıada-2023-tegi ekinshi medal. Ol Aısha Raqysheva, Nadejda Stepashkına engen qurammen estafetada «qolaǵa» qol jetkizgen edi.