Qysqy Ýnıversıada: short-trekten Qazaqstan áıelder quramasy qola júldeger atandy

ASTANA. QazAqparat - Búgin Balýan Sholaq atyndaǵy sport saraıynda 28-inshi qysqy Ýnıversıadanyń short-trek baǵdarlamasy boıynsha áıelder arasynda 3 myń metrlik qashyqtyqta estafeta jarysy márege jetti,  dep habarlaıdy «QazAqparat» HAA tilshisi.

Qazaqstandyqtar eń sońǵy sátterde japonııalyqtardy basyp ozyp, qola júldeni jeńip aldy. Ońtústik Koreıa sportshylary kezekti altynyna qol jetkizse, qytaılyqtar kúmis júldeni enshiledi.

Qazaqstan quramasy sapynda Kım Iong A, Anastasııa Krestova, Anıta Nagaı jáne Mádına Janbosynova óner kórsetti.

Bul - qazaqstandyq short-trekshi qyzdardyń ýnıversıadadaǵy tuńǵysh medali.

Aıta keteıik, qazirgi kezde erler arasyndaǵy estafetalyq jarys ótýde.