Qysqy Ýnıversıada: Denıs Nıkısha ekinshi márte qola júldeger atandy
Erler arasyndaǵy synda A fınalynda qos birdeı qazaqstandyq Denıs Nıkısha men Aıdar Bekjanov kúsh synasty. Denıs qola júldeni ıelense, Aıdar márege tórtinshi bolyp keldi. Altyn men kúmis medal ońtústikkoreıalyqtardyń qanjyǵasynda ketti. Bul - D.Nıkıshanyń osy ýnıversıadadaǵy ekinshi qolasy.
Ókinishke qaraı, osy qashyqtyqtaǵy myqtylardyń biri Nurbergen Jumaǵazıevke jartylaı fınalda tóreshiler penaltı berip, jarystan shettetti. Ýnıversıada barysynda Nurbergen osylaısha eki ret jazalandy.
Áıelder arasyndaǵy dodada qazaqstandyq Anastasııa Krestova jartylaı fınalda óner kórsetkenimen, óz tobynda máre syzyǵyn tórtinshi bolyp qıyp, júldeler sarapqa salynatyn bas fınalǵa shyǵa almady. Al Mádına Janbosynova men Qazaqstan azamattyǵyn alǵanyna úsh jylǵa jýyqtaǵan Kım Iong A shırek fınaldan asqan joq. Kım Iong A óz tobynda márege birinshi jetkenimen, tóreshiler tártip buzdy degen sebeppen oǵan da penaltı berip, báıge jolynan shyǵaryp tastady.
Aıta keteıik, osy synnan keıin Qazaqstannyń erler jáne áıelder quramasy estafetadan fınalda júldeli oryndar úshin básekege túsedi.
Jalpy, elimizde short-trektiń damýy budan 15 jyl buryn Oralda jabyq muz aıdyny saraıynyń ashylýymen baılanysty. Qazaqstannyń eńbek sińirgen jattyqtyrýshysy Mádiǵalı Qarsybekov bastaǵan mamandar osy ýaqyt ishinde elimiz quramasynyń negizin quraıtyn short-trekshilerdi daıarlaı bildi. Qazirgi tańda atyraýlyq Denıs Nıkıshadan basqalarynyń barlyǵy derlik BQO-dan túlep ushqan. Mysaly, 1993 jylǵy Aıdar Bekjanov - Qazaqstan quramasyndaǵy tájirıbeli sportshylardyń biri. Ol qazaq shorttrekshileri arasynda tuńǵysh ret 2010 jylǵy Vankýver olımpıadasyna qatysyp, 500 jáne 1 myń metr qashyqtyqta synǵa túsken bolatyn. Sodan keıin quramynda Abzal Ájiǵalıev, Aıdar Bekjanov, Nurbergen Jumaǵazıev jáne Denıs Nıkısha bar qazaqstandyq tórttik Sochı olımpadasynda estafetalyq synda besinshi oryndy ıelengen edi. Al ótken jyly Abzal Ájiǵalıev pen Nurbergen Jumaǵazıev aıdy aspanǵa shyǵaryp, álem kýbogy kezeńderinde jeńimpaz atandy. Osy Ýnıversıadanyń ózinde budan buryn jekeleı synda A.Ájiǵalıevtiń kúmis, N.Jumaǵazıev pen D.Nıkıshanyń qola júldeni ıelengeni belgili.