Qysqy Olımpıada oıyndaryna shyńjańdyq 3 qazaq sportshy qatysady

ShYŃJAŃ. QazAqparat – Beıjińdegi qysqy Olımpıada oıyndaryna qatysatyn Qytaı quramasynyń esimderi jarııalandy. Olardyń qatarynda 3 qazaq sportshysy da bar, dep habarlaıdy QazAqparat.

Qytaıdyń «Ortalyq halyq radıosynyń» dereginshe, XXIV qysqy Olımpıada oıyndarynda Baıan Jalynqyzy, Qadys Bádelhanuly, Aqnar Adaqqyzy sekildi úsh qandasymyz Qytaı quramasynyń atynan óner kórsetedi.

Aıta keteıik, qandasymyz Baıan Jalynqyzy 1999 jyly Altaıdyń Jemeneı aýdanynda dúnıege kelgen. Ol Beıjiń qalasynda ótetin 2022 jylǵy XXIV qysqy Olımpıada oıyndarynda Taý shańǵysy sportynan óner kórsetedi. Baıan 2018 jyldan bastap Norvegııa elinde 3 jyl boıy taý shańǵysy sporty boıynsha daıyndalyp, biliktiligin shyńdaǵan.

Al Aqnar Adaqqyzy 1999 jyly Qytaıdyń Shyńjań ólkesiniń Quttybı aýdanynda týǵan. Qazirgi kúni Aqnar konkımen júgirýden Qytaı quramasynyń múshesi. Ol osy ýaqytqa deıin talaı márte respýblıkalyq jáne halqaralyq jarystardyń bas júldesin jeńip alǵan. Jastar arasyndaǵy konkımen júgirýden 2019-2020 jylǵy Álem kýbogynyń eki kezeńine qatysqan Aqnar altynnan alqa taqqan.

Taǵy bir qandasymyz Qadys Bádelhanuly 1999 jyly Qytaıdyń Fýkań qalasynda týǵan. Ol osy jolǵy Olımpıada oıyndarynda taý shańǵysy sportynan óner kórsetedi.