Qysqy Olımpıada oıyndaryna eń kóp qatysqan sportshy

ASTANA. QazAqparat - Japon sportshysy Norıakı Kasaı qysqy Olımpıada oıyndary tarıhynda rekord ornatty. Ol Phenchhanda mansabyndaǵy 8-shi aq Olımpıadasyna qatysyp jatyr, dep jazady massaget.kz.

Kamıkadze degen laqap atpen tanymal Norıakı Kasaı tuǵyrdan sekirý sportynan baq synaıdy. Ol 1992 jyldan beri Olımpıadaǵa qatysyp keledi. 45 jastaǵy japon sportshysy keshe qalypty tuǵyrdan sekirý saıysynyń irikteý kezeńinen súrinbeı ótip, fınaldyq kezeńge joldama aldy. Alda júlde úshin talas júrgizip kóretin bolady.

Júlde demekshi, Norıakı osyǵan deıin Olımpıada oıyndarynda 2 kúmis 1 qola medal enshilegen. 2014 jyly Sochıde ótken dodada tuǵyrdan sekirýdiń K-125 saıysy boıynsha «kúmis» alǵan.

Jarys aıaqtalǵannan keıin 2018 jylǵy Phenchhan, tipti 2022 jylǵy Olımpıada oıyndaryna da qatysqysy keletinin aıtqan bolatyn.

Norıakı Kasaı - qysqy Olımpıada oıyndaryna 8 ret qatysyp otyrǵan tuńǵysh sportshy. Ol osyǵan deıin 7 ret qatysqan reseılik sportshy Albert Demchenkomen (shana sporty) úzeńgi qaǵystyryp kelgen edi.

Japon sportshysy Phenchhanda reseılik sportshyny basyp ozdy. Albert 2014 jylǵy Olımpıadadan keıin mansabyn aıaqtaǵan bolatyn.