Qys boıy elordada 4,5 mln tekshe metr qar shyǵaryldy

ASTANA. 27 naýryz. QazAqparat - Bıylǵy qysta elorda kóshelerine qar qalyń tústi. Ásirese, bul kommýnaldyq qyzmet salasynyń jumysshylaryna óte aýyrlyq alyp keldi.

Qala kóshelerinen aıazdy kúnderi jyldaǵydan eki ese kóp qar kúrep, shyǵarý olarǵa shynynda da ońaı bolǵan joq. Astana.kz saıtyna «Astana tazalyq» mekemesinen habarlaǵanyndaı, kásiporyn qyzmetkerleri osy qysta qaladan 4 482 201 tekshe metr qar kúrep, shyǵarypty. Eger salystyrar bolsaq, ótken jyly qysta qaladan 2 mln. tekshe metr qar shyǵarylǵanyn kóremiz. Bul eki ese az.

Qys mezgilinde Astana kóshelerine kún saıyn 850-ge tarta qar tazalaıtyn tehnıkalar shyǵarylady. Sonymen qatar, qardy qolmen kúreıtin 14 brıgadada 442 adam jumys isteıdi. MPÝÝ-1, «Boshýng - Ponı» qar kúreý tehnıkalary, avtomashınalar, tıep-túsirý mashınalary, traktorlar trotýarlar men aıaldamalardy, avtoturaqtar men aýla ishin tazalaýǵa kúni boıy jumyldyrylady.

Mehanıkamen jáne qolmen jınalǵan qar KamAZ mashınalaryna tıelip, arnaıy qar polıgondaryna jóneltiledi. Mundaı polıgon Astanada úsheý. Birinshisi - Kóktal kentinde, burynǵy MAI beketiniń mańynda ornalasqan; ekinshisi - Rojdestvenka aýyly baǵytynda; úshinshisi - Jeleznodorojnyı kenti aýdanynda.

Bıylǵy qysta elordanyń tek Almaty aýdanynan polıgonǵa kún saıyn 400 KamAZ qar tasyldy.