Qyrymbek Kósherbaev pen Berdibek Saparbaev ortaq másele kóterdi
Óńir ákimderi óz usynystaryn Astanada QR Memlekettik hatshysy Gúlshara Ábdiqalyqovanyń tóraǵalyǵymen ótken Memlekettik rámizder men vedomstvoaralyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń kezekti otyrysynda bildirdi.
Qyzylorda oblysynyń ákimi Qyrymbek Kósherbaev óńirde Memlekettik rámizderge degen qurmetti qalyptastyrý, jas urpaqtyń sanasyna sińirý - eń basty mindetterdiń biri ekenin atap ótti. Ákimniń aıtýynsha, Syr óńirinde bul baǵytta aýqymdy jumystar atqarylyp jatyr. Tarqatyp aıtqanda, 2016 jyly Qyzylordada bıiktigi 60 metrlik tý tuǵyry bar. Jalpy, 3 gektardy quraıtyn Memlekettik rámizder alleıasy paıdalanýǵa berilgen. Oblys ákimdiginiń janyndaǵy arnaıy komıssııanyń sheshimimen endigi kezekti barlyq aýdan ortalyqtary men 46 tirek eldimekenderinde dál osyndaı alleıalar paıda bolady.
Onyń aıtýynsha, Qyzyorda oblysyndaǵy barlyq memlekettik mekemelerde, bilim berý uıymdarynda Memlekettik rámizder talapqa saı ornatylǵan. Dese de, Qyrymbek Kósherbaev bir máselege baılanysty óz oıyn bildirdi.
«Degenmen problema da joq emes. Memlekettik rámizderdi daıyndaıtyn lıtsenzııasy men sertıfıkattary bar jeke seriktestik mekemeler Memlekettik rámizder týraly Qazaqstan Respýblıkasynyń konstıtýtsııalyq zańyn sáıkes kelmeıtin Memlekettik rámizderdi paıdalanýǵa berýde. Bul jaǵdaılar Qaraǵandy qalasynda ornalasqan «Aq bastaý KZ» JShS jáne Astana qalasynda ornalasqan «Zým» jarnama agenttigi» JShS-da kezdesti. Bul jóninde tehnıkalyq retteý jáne metrologııa komıtetine tıisti usynys berildi», - dedi Qyrymbek Kósherbaev.
Qyzylorda oblysy ákiminen keıin baıandama jasaǵan Aqtóbe oblysynyń ákimi Berdibek Saparbaev da áriptesiniń usynysyn qoldaıtynyn bildirdi.
«Qyrymbek Eleýuly jańa ǵana aıtyp ketti. Men sol usynysty qoldaıyn dep edim. Qurmetti komıssııa músheleri ózderińiz jaqsy bilesizder, Týdy, Eltańbany qazirgi tańda daıyndaıtyn mekemeler kóp. Olardyń árqaısysy ártúrli daıyndaıdy. Tapsyrys berýshi bizbiz, daıyndaıtyn olar. Biraq olarda eshqandaı jaýapkershilik joq. Sondyqtan, bizdiń usynysymyz - birinshiden olardyń da jaýapkershiligin arttyrý kerek. Ekinshiden, olardan daıyndap jatqan Memlekettik rámizder memlekettik standarttarǵa sáıkes bolý kerektigin suraý kerek. Eger olardyń lıtsenzııa bolatyn bolsa, olar sondaǵy kórsetilgen talaptardy tolyǵymen oryndaýy tıis. Sol kezde eshqandaı kemshilikter bolmaıdy dep oılaımyz», - dedi Berdibek Saparbaev.