Qyrymbek Kósherbaev mádenıet jáne óner qaıratkerlerine Elbasy stıpendııasyn tabystady
Qazaqstan Respýblıkasynyń Memlekettik hatshysy Qyrymbek Kósherbaev Memleket basshysy Qasym-Jomart Toqaevtyń tapsyrmasy boıynsha belgili mádenıet jáne óner qaıratkerlerine Qazaqstan Respýblıkasynyń Tuńǵysh Prezıdenti – Elbasynyń 2020 jylǵy mádenıet salasyndaǵy memlekettik stıpendııasyn tabys etti. Memlekettik stıpendııa Qazaqstannyń 75 ádebıet pen óner qaıratkerine taǵaıyndaldy. Saltanatty rásimge Qazaqstan Respýblıkasynyń Mádenıet jáne sport mınıstri Aqtoty Raıymqulova jáne Almaty qalasynyń ákimi Baqytjan Saǵyntaev qatysty.
Memlekettik hatshy atap ótkendeı, bıylǵy jyl Qazaqstan Táýelsizdiginiń 30 jyldyǵy aıasynda ótedi. Demek Táýelsizdiktiń mereıtoılyq jylynyń bastalýy Memleket basshysy Q.Q.Toqaevtyń «Táýelsizdik bárinen qymbat» atty baǵdarlamalyq maqalasynyń jaryqqa shyǵýymen erekshelendi.
El Prezıdentiniń maqalasynda Táýelsizdiktiń ár onjyldyǵynyń tarıhı máni, irgeli bastamalary men Tuńǵysh Prezıdent – Elbasy N.Á.Nazarbaevtyń sheshýshi róli, qazaq memlekettiligin qalyptastyrýdaǵy halqymyzdyń danalyǵy men birligi, eńbekqorlyǵy aıqyn jazylǵan. Memleket basshysy Táýelsizdigimizdiń qasıetti qundylyqtary týraly zamanaýı túsinikti tereń ári aýqymdy túrde ashyp, aldaǵy tórtinshi onjyldyqtyń basty maqsattaryn aıqyndady.
Qyrymbek Kósherbaev bizdiń qoǵam Prezıdenttiń maqalasyn memleketimizdiń damýyndaǵy jańa kezeńniń ıdeologııalyq tujyrymdamasy jáne baǵdarlamasy retinde qabyldaǵanyn basa aıtty.
Máselen, Prezıdenttiń halqymyzdyń san ǵasyrlyq shynaıy tarıhyn, onyń ishinde sheteldik aýdıtorııaǵa Qazaqstannyń qysqa tarıhyn jazyp, álemniń negizgi tilderine aýdarý týraly bastamasy shyn máninde de strategııalyq mańyzdy másele. Sondyqtan qazaq zııalylaryna ulttyq múddeler men jańa ǵylymı tásilderdi eskere otyryp, óz tarıhyn zerdeleý, pandemııanyń, jahandyq daǵdarystyń jáne saıası týrbýlenttiliktiń qazirgi jaǵdaıynda qoǵam damýynyń ólshemderin aıqyndaý boıynsha orasan zor jumys júrgizý mindeti qoıyldy.
Memlekettik hatshy sonymen birge memlekettik qoldaý elimizdiń rýhanı negizderin odan ári nyǵaıtýǵa, qoǵamdyq sanany jańǵyrtýǵa jáne Táýelsizdigimizdiń qasıetti qundylyqtaryn nasıhattaýǵa múmkindik beretin jańa ıdeıalar men jobalardy izdeýge tyń serpin beretinine senim bildirdi.
Qazaqstan Respýblıkasynyń Tuńǵysh Prezıdenti – Elbasy stıpendııasy Ábdijámil Nurpeıisov, Asanáli Áshimov, Nurǵalı Núsipjanov, Aleksandr Garkovets, Dýlat Isabekov, Iranbek Orazbaev, Bolat Aıýhanov, Gýlvıra Razıeva jáne basqa da qazaq ádebıeti men óneriniń maıtalmandaryna tabystaldy.
Sonymen birge, aqyndar Baýyrjan Halıolla, Mıras Asan, balerına Ásel Janǵasqaeva, akter Aıan Ótepbergen, ónertanýshy Valerııa Nedlına jáne ózge de jas daryndarǵa memlekettik qoldaý kórsetildi.