Qyrkúıekten bastap Almaty men Delı arasynda tikeleı áýe reısteri ashylady

ASTANA. QazAqparat - Mádenıet jáne sport mınıstrliginiń jáne Kazakh Tourism qatysýymen IndiGo iri úndi avıakompanııasy «Delı – Almaty – Delı» tikeleı reısin iske qosady. Osy baǵyt boıynsha reıster qyrkúıek aıynyń sońynda bastalady jáne aptasyna úsh ret oryndalady, dep habarlaıdy QazAqparat.

Atalǵan reıs Úndistandaǵy 75-ten astam baǵytqa, sondaı-aq Azııanyń iri qalalaryna reısterdi oryndaıtyn avıakompanııa úshin 32-shi Halyqaralyq tikeleı baılanys sanalady.

Sondaı-aq, avıakompanııanyń Eýropa men Soltústik Amerıkada óziniń seriktestik kodtary arqyly úlken jelisi bar.

Bıyl IndiGo kompanııasy Skytrax usynǵan «Úndistan men Ońtústik Azııadaǵy úzdik bıýdjettik avıakompanııa» syılyǵynyń qatarynan 13-shi ret ıegeri atandy.

«Sheteldik avıakompanııalarmen jańa tikeleı reısterdi iske qosý boıynsha kelissóz únemi júrgizilip turady. Atap aıtqanda, sońǵy ýaqytta Qatar, Mysyr jáne Qytaıǵa ushý jıiligi artty. Sheteldik kompanııalar Qazaqstanǵa úlken qyzyǵýshylyq tanytyp otyr. Mysaly, osy jazda Omannyń Salam Air avıakompanııasy «Almaty – Maskat» baǵyty boıynsha aptasyna 2 ret jıilikpen reısti iske qosty», - deıdi Mádenıet jáne sport mınıstrliginiń resmı ókili Móldir Ábdýalıeva.