Qyrkúıekte jańadan otaý qurǵan jastarǵa arnalǵan aqparattyq-túsindirý sharalary bastalady

ASTANA. QazAqparat – Bıyl qyrkúıekte erli-zaıyptylar úshin aqparattyq-túsindirý sharalarynyń kesheni iske qosylady. Bul jaıynda Premer-Mınıstr Álıhan Smaıylovtyń Májilis depýtattarynyń saýalyna bergen jaýabynda aıtylǵan, dep habarlaıdy QazAqparat tilshisi.

«Otbasy qundylyqtardy odan ári nyǵaıtý maqsatynda Aqparat jáne qoǵamdyq damý mınıstrligi Tsıfrlyq damý, ınnovatsııalar jáne aeroǵarysh ónerkásibi mınıstrligimen birlesip, osy jyldyń qyrkúıek aıynda nekege turǵan erli-zaıyptylar úshin oń yqpaly bar otbasylyq dástúrler men rýhanı-adamgershilik qundylyqtardy saqtaý, otbasyn josparlaý jáne erler men áıelderdiń reprodýktıvti densaýlyǵyn qorǵaý máselesi boıynsha nekege turǵan erli-zaıyptylar úshin aqparattyq-túsindirý sharalarynyń keshenin (e-gov platformasyndaǵy jadynama, oflaın jáne onlaın formattaǵy beınerolıkter, semınarlar men trenıngter jáne basqa da sharalar) iske qosýdy josparlap otyr», - dep atap ótedi Úkimet basshysy.

Premer-Mınıstrdiń dereginshe, elimizde otbasylyq-turmystyq zorlyq-zombylyqtyń profılaktıkasy salasynda belgili oń dınamıka baıqalady.