Qyrkúıekte tumaýǵa qarsy 1,5 mln. vaktsına aýrýhanalarǵa jetkiziledi

ASTANA. QazAqparat - Dári-dármekti satyp alý boıynsha biryńǵaı dıstrıbıýtor «SQ-Farmatsııa» 2017 jylǵy epıdemıologııalyq maýsymǵa qarsy bir jarym mıllıondaı doza tumaýǵa qarsy vaktsına satyp aldy, dep habarlaıdy kompanııanyń baspasóz qyzmeti.

Biryńǵaı dıstrıbıýtor basqarma tóraǵasy Maksım Kasatkınniń aıtýynsha, vaktsınanyń mundaı kólemin jetkizýge qatysty shart tender qorytyndylary boıynsha 2016 jyldyń qarasha aıynda jasalyp qoıǵan. Halyqtyń neǵurlym osal tobyna tegin vaktsınatsııa jasaý úshin memleket 1,2 mlrd. teńgeden asa qarajat jumsady.

«Vaktsınalar ótken jyldyń kúzinde satyp alynǵan, alaıda jetkizý epıdemııalyq maýsymnyń eń basyna, ıaǵnı 2017 jyldyń qyrkúıegine josparlanǵan. Qazir osy mezgil jetti jáne jaqyn arada ónim berýshi biryńǵaı dıstrıbıýtordyń qoımalaryna vaktsınany túsirý jumystaryn bastaıdy», - dep túsindirdi Maksım Kasatkın.

Ol, sonymen qatar, eger qosymsha qajettilikter týyndaǵan jaǵdaıda ónim berýshi qazaqstandyqtar úshin taǵy da jarty mıllıon dozaǵa deıin vaktsına jetkize alatynyn habarlady.

Aıta ketý kerek, bizdiń elimizde tumaý vırýsynan halyqty vaktsınatsııalaý boıynsha belsendi jumys júrgizilýde. Vaktsınatsııamen qamtý arqasynda Qazaqstanda JRVI jáne tumaý aýrýshańdyǵy 2006 jyldan 2016 jylǵa deıingi kezeńde úsh jarym eseden astamǵa tómendedi.