Qyrǵyzstannyń Syrtqy ister mınıstri dıplomattaryn evakýatsııalaǵany úshin Toqaevqa alǵys aıtty

NUR-SULTAN. QazAqparat - Qazaqstan Respýblıkasy Premer-Mınıstriniń orynbasary – QR Syrtqy ister mınıstri Muhtar Tileýberdi Qyrǵyz Respýblıkasynyń Syrtqy ister mınıstri Rýslan Kazakbaevpen telefon arqyly sóılesti, dep habarlaıdy QazAqparat SІM saıtyna silteme jasap.

R.Kazakbaev Aýǵanstannan 14 qyrǵyz azamatyn, sonyń ishinde olardyń dıplomattaryn qaıtarýǵa baýyrlas kómek kórsetkeni úshin QR Prezıdenti Qasym-Jomart Toqaevqa jáne QR Úkimetine alǵysyn bildirdi.

Mınıstrler AIR-daǵy ahýaldyń damýyn monıtorıngileý boıynsha tyǵyz ózara is-qımyl jasaý jáne jedel máselelerdi sheshýdegi odan ári birlesken sharalar týraly ýaǵdalasty.

Eske sala ketsek, Qazaqstan áskerı ushaqpen Aýǵanstannan 42 adamdy evakýatsııalady. Osy bortta qazaqstandyqtarmen birge 14 Qyrǵyzstan azamaty boldy.