Qyrǵyzstannyń eks-prezıdenti Qurmanbek Bákıev jemqorlyq áreketi úshin 10 jylǵa sottaldy

BІShKEK. QazAqparat – Qyrǵyzstan Respýblıkasynyń burynǵy Prezıdenti Qurmanbek Bákıev sybaılas jemqorlyq áreketi úshin 10 jylǵa bas bostandyǵynan aıryldy, dep habarlaıdy QazAqparattyń menshikti tilshisi.

Bishkek qalasynyń Pervomaı aýdandyq soty Qyrǵyzstannyń eks-prezıdenti Qurmanbek Bákıevti «Kýmtor» altyn ken ornyna qatysty sybaılas jemqorlyq týraly is boıynsha 10 jylǵa bas bostandyǵynan aıyrý úkimin shyǵardy.

Sot ınstantsııasynyń baspasóz qyzmeti habarlaǵandaı, úkim 2023 jyldyń 1 naýryzda shyqty. Oǵan sáıkes Qyrǵyzstan Respýblıkasynyń burynǵy prezıdentiniń jeke múlki tárkilenip, 3 jyl merzimge memlekettik qyzmet atqarýǵa tyıym salynyp, 10 jylǵa sottaldy.

Qyrǵyzstan Joǵarǵy sotynyń 2016 jylǵy 29 shildedegi qaýlysyn eskere otyryp, jazany ishinara qosý arqyly Pervomaı aýdandyq soty Qurmanbek Bákıevke qatań rejımdegi túzeý kolonııasynda jazasyn óteı otyryp, 30 jyl merzimge bas bostandyǵynan aıyrý jazasyn túpkilikti belgiledi.

Odan bólek, Qyrǵyzstan Respýblıkasynyń Qylmystyq kodeksiniń 336-baby 2-bóligine sáıkes («sybaılas jemqorlyq») istiń basqa da qatysýshylary jazaǵa tartyldy.

- Qyrǵyzstan Respýblıkasy Qarjy mınıstriniń burynǵy orynbasary Ámirlan Toromyrzaev jalpy rejımdegi túzeý kolonııasynda jazasyn ótep, múlki tárkilenip, 3 jyl merzimge memlekettik laýazymdardy atqarýǵa tyıym salýmen 12 jylǵa sottaldy;

- Qyrǵyzstannyń burynǵy syrtqy saýda jáne ónerkásip mınıstri Sadrıddın Jıenbekov múlki tárkilenip, 3 jyl merzimge memlekettik qyzmet atqarý quqyǵynan aıyrylyp, 10 jylǵa bas bostandyǵynan aıyryldy;

- QR Geologııa jáne mıneraldyq resýrstar agenttiginiń burynǵy basshysy Qapar Qurmanalıev qatań rejımdegi túzeý kolonııasynda jazasyn ótep, múlki tárkilenip, 3 jyl merzimge memlekettik laýazymdardy atqarýǵa tyıym salýmen 13 jylǵa sottaldy;

- Ortalyq damý, ınvestıtsııalar jáne ınnovatsııalar agenttigi basshysynyń burynǵy orynbasary Alekseı Elıseev qatań rejımdegi túzeý kolonııasynda jazasyn ótep, memleket kirisine 15 myń som aıyppul salyp, múlki tárkilenip, 30 jylǵa bas bostandyǵynan aıyryldy;

- Úkimet apparatynyń quqyqtyq bóliminiń burynǵy basshysy Elena Belkovskaıa jalpy rejımdegi túzeý kolonııasynda jazasyn óteı otyryp, múlki tárkilenip, 3 jyl merzimge memlekettik laýazymdardy atqarýǵa tyıym sala otyryp, múlki tárkilenip, 9 jylǵa bas bostandyǵynan aıyryldy;

- Eks-prezıdenttiń uly Maksım Bákıev múlki tárkilenip, 3 jyl merzimge memlekettik qyzmet atqarý quqyǵynan aıyra otyryp, aıryqsha rejımdegi kolonııada jazasyn óteı otyryp, ómir boıyna bas bostandyǵynan aıyrýǵa úkim shyǵardy.