Qyrǵyzstannyń densaýlyq saqtaý mınıstri ustaldy

NUR-SULTAN. QazAqparat – Qyrǵyzstan Respýblıkasynyń densaýlyq saqtaý mınıstri Alymkadyr Beıshenalıev sybaılys jemqorlyq kúdigimen qamaýǵa alyndy, dep habarlaıdy QazAqparat Kabar agenttigine silteme jasap.

Qyrǵyzstannyń Bas prokýratýrasynyń baspasóz qyzmeti habarlaǵandaı, densaýlyq saqtaý mınıstrliginiń basshylyǵy keıbir laýazymdy tulǵalarmen birge Qyrǵyzstan Prezıdentiniń «Densaýlyq saqtaý júıesin damytý jónindegi shuǵyl sharalar týraly» Jarlyǵynyń talaptaryn óreskel buzyp, aqshany jylystatý shemasyn uıymdastyrdy.

«Máselen, 2020 jylǵy jeltoqsannan bastap 2021 jyldyń qyrkúıegine deıin Qyrǵyzstan halyqaralyq uıymdardan, sondaı-aq Reseıden, Qytaıdan, Ázerbaıjannan jáne Qazaqstannan COVID-19-ben kúres úshin óteýsiz gýmanıtarlyq kómek túrinde 451 560 vaktsına aldy. Budan basqa, Qyrǵyz Respýblıkasynyń Prezıdenti Reseı men Qytaı basshylarymen gýmanıtarlyq kómek túrinde 6 mln vaktsına dozasyn berý týraly ýaǵdalastyqqa qol jetkizdi. Soǵan qaramastan, densaýlyq saqtaý mınıstri A.Beıshenalıevtiń tapsyrmasy boıynsha 2021 jyldyń sáýir, maýsym, shilde jáne qyrkúıek aılarynda jeke sheteldik kompanııalardan 1 mlrd 581 mln 474 myń 315 somǵa 2 mln doza vaktsına satyp alynady. Atalǵan qarjy offshorǵa aýdaryldy», - delingen habarlamada.

Osylaısha, 3 mıllıon 147 640 doza vaktsınanyń baryna qaramastan, sheneýnikter jeke bas paıdasy úshin taǵy 2 mıllıon 460 myń vaktsına dozasyn satyp aldy. Aıta keterligi, satyp alynǵan vaktsınalardyń 243 223 dozasynyń jaramdylyq merzimi ótken, qalǵan dozalardyń da saqtaý merzimi aıaqtalýǵa jaqyn.

«Nátıjesinde memleketke 1 mlrd 581 mln 474 myń 315 som kóleminde zalal keltirildi. Atalǵan fakti boıynsha Qyrǵyzstan Respýblıkasynyń Bas prokýratýrasy QK 336-baby («sybaılas jemqorlyq») boıynsha qylmystyq is qozǵap, tergeý amaldary júrip jatyr», - deıdi vedomstvodan.