Qyrǵyzstannan Reseıge baǵyttalatyn tranzıtke tarıf quny edáýir tómendetildi - QTJ
«Aýyl sharýashylyǵy bizben birge karantındik baqylaýǵa jatatyn júkterdiń tasymaldanýy sharttaryna qatysty qyrýar jumys atqardy. 10 qańtardan bastap, Qyrǵyzstanǵa, Qyrǵyzstannan Qazaqstan aýmaǵy arqyly tasymaldaý sharttary jeńildetiledi. Qyrǵyzstan EAEO-ǵa engendikten, «Qazaqstan temir joly» 10 qańtardan bastap, tranzıttik tasymaldarǵa birizdi tarıf engizedi», - dep atap ótti ol.
Onyń sózine qaraǵanda, tarıf qunynyń tómendeýi bıyl tamyz aıynda oryn alýy tıis bolǵan, alaıda Qazaqstan ony merziminen buryn engizip otyr.
Kýlakovtyń atap ótkenindeı, Qyrǵyzstannyń mal sharýashylyǵy ónimderi Reseı aýmaǵyna tasymaldanǵanda, temir jol kóligimen qazaq-qyrǵyz memlekettik shekarasy aýmaǵyna kirgende - Lýgovoı beketimen, RF terrıtorııasyna shyqqanda - Iletsk beketi arqyly júrgiziledi. Jol uzyndyǵy - 2021 shaqyrym. Burynǵy tarıf boıynsha, refrıjeratorlyq vagon arqyly tasymal jasaý 5155 dollar bolsa, 10 qańtardan bastap, 1 820,7 dollar turmaq. Demek, tarıf quny 2,83 ese arzandatylǵan.
«QTJ-Júk tasymaly» AQ prezıdentiniń túsindirýi boıynsha, tarıf deńgeıiniń tómendeýi saldarynan qyrǵyz tasymalynan túspeı qalatyn 42 mıllıard teńge kiris, tasymal kóleminiń 3 esege artýy esebinen jabylatyn bolady.
Aıta keteıik budan buryn habarlaǵanymyzdaı, QR Aýyl sharýashylyǵy mınıstrligi qyrǵyz aýylsharýashylyq ónimderiniń Reseı Federatsııasyna Qazaqstan arqyly tasymaldaýyna ruqsat berdi.
Mundaı sheshim 2016 jyldyń 26 jeltoqsanynda Sankt-Peterbýrgtegi Eýrazııalyq ekonomıkalyq odaqtyń Joǵary keńesiniń ekonomıkalyq komıssııasynda qol jetkizilgen. Oǵan sáıkes, Qyrǵyzstan aýyl sharýashylyq ónimderiniń 102 taýary elimiz arqyly Reseıge, ary qaraı Belarýs naryqtaryna shyǵa alady. Degenmen qazaq-qyrǵyz memlekettik shekarasy aýmaǵynda sanıtarlyq-veterınarlyq baqylaý saqtalǵan.
Búgingi tańda EAEO múshe-memleketteriniń ókiletti ınspektsııalyq organdarynyń birlesken qorytyndysy boıynsha qyrǵyzdyń 15 mekemesi reseılik naryqqa jáne 8 mekeme qazaqstandyq naryqqa (ońtústik aımaqqa) veterınarlyq baqylaýǵa jatatyn belgili bir taýarlardy jetkizýge múmkindik aldy. Mysaly, termıkalyq (jylý) óńdeýden ótken sút ónimderi, daıyn et jáne balyq ónimderi.