Qyrǵyzstanmen shekarada qazaqstandyq kedenshiler 11 kelige jýyq geroın tárkiledi
13:29, 27 Sáýir 2013
ASTANA. 27 sáýir. QazAqparat - 23 sáýirde «Qarasý» kedendik beketinde Qyrǵyzstannan Qazaqstanǵa baǵyt alǵan «Mersedes-Bents 220E» jeńil kóligin skanerleý kezinde avtomashınanyń artqy oryndyǵynan jalpy salmaǵy 11 kelige jýyq geroın anyqtaldy.
Bul týraly QR Qarjy mınıstrligi Kedendik baqylaý komıtetiniń baspasóz qyzmetinen habarlandy.
Esterińizge sala keteıik, 20 sáýirde Almaty oblysynda kedenshiler men polıtseılerdiń birlesken shuǵyl-izdestirý sharalaryn ótkizý kezinde Kerbulaq aýdanynda «Aýdı-100» markaly kóligi toqtatylyp, onda jalpy salmaǵy 1 keli 669,96 gramm geroın tabyldy. Atalǵan esirtki de Qyrǵyzstannan jetkizilgen.
Atalǵan faktiler boıynsha qylmystyq is qozǵaldy. Atap aıtqanda, jyl basynan beri kedenshiler esirtkiniń zańsyz aınalymyna baılanysty 14 faktini anyqtady. Zańsyz aınalymnan 46 keli 939 gramm esirtki zattary tárkilenip, onyń 21 keli 689 gramy- geroın.